Sinan Idrizi i vendos kushte Emiljano Çelës. I ka ofruar garanci financiare për merkaton, por qartazi dhe prerazi kërkon nga trajneri që të mos marrë lojtarë “zvarranikë”. Gjatë një interviste të dhënë për “Panorama Sport”, presidenti zbuloi se të gjitha kontratat do të jenë dyvjeçare.
Gjithkush mund të mendojë se do të ketë penalitete, por jo. Këtë herë ka menduar të veprojë ndryshe. Nuk i del inati me lojtarët që mbyllën sezonin, sidomos me ndeshjen e fundit kundër Korabit.
Për herë të parë i jep të drejtë Komisionit të Disiplinës dhe fajëson ekipin, që u përpoq të mbulonte humbjen me sherr. Por një thumbim nuk kishte si të mos e jepte për FSHF-në.
Ka nisur zyrtarisht merkatoja te Flamurtari. Si do të veproni këtë herë?
Trajneri ka bërë një listë lojtarësh. Kemi qenë pak a shumë në një mendje tek ata që do të qëndrojnë. Tek afrimet e reja pastaj, i kam thënë që të mos kursehet. Duam lojtarë që të jenë të denjë në ekip. Çela ka një listë, në të cilën ka emra të futbollistëve që kanë luajtur në Superiore. Le të vijnë, t’i shikojmë…
Keni një mesazh për trajnerin e ri?
Mesazhi im për trajnerin është i qartë. Këtu vetëm zvarranikë nuk pranohen. Zvarranikë dhe… shiko, se m’u kujtua ajo historia e dënimeve.
Për çfarë dënimesh po flisni?
Për vendimet që dha Disiplina, duke dënuar si gjithnjë lojtarët tanë. Është e para herë që unë pajtohem me këtë komision. E dini pse? Mirë pjesën e nervave që nuk e mbajnë dot këta lojtarët e Flamurtarit, por përpiqen që t’i devijojnë humbjen.
Dhe e dini si, duke bërë shou të atij tipi. Normale që duhen ndëshkuar. Dënimet ishin të drejta. Pikërisht këtë i thashë trajnerit të ri: “Këtu zotëri, ne duam një ndeshje që fitohet në fushë si burrat, kaq”. Trajneri është i qartë për këtë që ne kërkojmë, tani të shikojmë.
Por edhe klubi u ndëshkua me gjobë nga Disiplina për sjellje të gabuar të spektatorëve. Keni një reagim?
Unë nuk e kuptoj këtë. E para, ne nuk kemi pasur as spektatorë dhe e dyta nuk ishim as organizatorë. Më tregoni një moment kur tifozët e Flamurtarit hodhën diçka në fushë. Si e përcaktojnë këta që janë të tanët, Tiranës, Dinamos, Korabit apo të Lushnjës? Si e përcaktojnë? Nuk jemi ne që e kemi organizuar. Na çuan një “faks”, sepse ai ishte turpi i federatës.
Çfarë “faksi”?
“Me Apoloninë ti nuk lejohesh të kesh spektatorë, por me Korabin lejohesh…” Çfarë ka ndodhur që na lejuan neve, më thuaj mua ti tani?! Nuk kemi kërkuar as falje. Pse e bën këtë? Na dërguan një “e-mail” atje, një shkarravinë nga ato që çojnë këta… Janë disa të tilla, por kjo ishte një shkarravinë ordinere. Ne nuk kemi pasur tifozë, këta na dënojnë. Do të marrin 1 milion lekë nga ne. Po le t’i marrin, t’i gëzojnë!
Flasim pak për synimet që keni. Si do të jenë kontratat për sezonin e ri?
Unë dua kontratat minimumi 2-vjeçare. Nuk do të jenë më sezonale. Edhe me trajnerin Emiljano Çela do të kemi një bashkëpunim dyvjeçar.
Do të kenë penalitete kontratat?
Kontratat do të jenë pa penalitete. Ndëshkimi më i madh për ta dhe asaj që do të japin në fushë, do të jetë përbuzja që mund të marrin nga tifozët vlonjatë. Asnjë penalitet! Nuk ka penalitet më të madh në botë sesa të jesh i përbuzur nga një qytet. Të tjerat pastaj janë histori të tjera. Xhepat mbushen dhe zbrazen, kanë ciklin e tyre. Por përbuzja ngelet përbuzje. Nuk ka më te ne, ta harroni këtë histori tani.
Do të përqendroheni tek akademia?
Do të zgjerojmë rolin e akademisë. Me ndërtimin e fushave të reja tani në Pyllin e Sodës, do të kërkojmë që të ndërtojmë edhe skuadër për 21-vjeçarët. Prandaj këtë ia bëra të qartë edhe trajnerit. Do të ketë një koordinim më të plotë midis akademisë, strukturave, zbuluesve të talenteve, trajnerëve dhe drejtorit sportiv. Pra do të jetë një koordinim klasik./PanoramaSport
Discussion about this post