Profesori shqiptar Besfort Idrizi në Maqedoninë e Veriut është zgjedhur si dekan në fakultetin e Arteve Dramatike “Shën Kirili dhe Metodi” në Shkup. Ky është shqiptari i parë që merr këtë detyre të lartë në një universitet në Shkup.
Lajmin e ka bërë të ditur vet ai me atë të një postimi në Facebook, ku shkruan se e ka obligim ta çojë detyrën e tij deri në fund.
Postimi:
Sot, nga ana e profesorëve të Fakultetit të Arteve Dramatike Shkup u zgjodha dekan i fakultetit.
Me besimin e kësaj detyre, jo vetëm që më është bërë një nder i jashtëzakonshëm, por njëkohësisht e pranoj si detyrë me obligim të madh moral, sidomos duke e pasur parasysh që do duhet të udhëheq me institucionin ku unë kam studiuar, dhe ku kolegë i kam profesorët e mi nga të cilët mësova dhe vazhdoj të mësoj.
Obligim akoma më të madh ndjej ndaj studentëve, të tanishëm dhe të ardhshëm, të cilët janë shpirti i fakultetit dhe të cilëve duhet t’u ofrojmë studime cilësore si parakusht për ardhmërinë e tyre të ndritshme.
Uroj që klima e sotme pozitive të na ndjek gjithmonë dhe të mundemi bashkërisht të krijojmë kushte më të mira për punë dhe studim, si dhe të prodhojmë kuadro me të cilat të gjithë do të krenohemi.
Discussion about this post