Kandidati i koalicionit “Bashkë Fitojmë” për Bashkinë e Durrësit, Igli Cara, ka komentuar Portin e Durrësit duke thënë se opozita nuk është kundër kthimit të tij në një port jahtesh.
Nëpërmjet një postimi në rrjetin social Instagram, Cara ka shkuar se ky projekt nuk do të shkonte më shumë se 20 milionë euro. Sipas tij, e gjithë kjo që po bëhet është një koperturë për të mbuluar vjedhjen e madhe që po bëhet me pronat e portit, që sipas revistës Monitor shkon në 3 miliardë euro.
“Ne si durrsakë e kemi menduar shpesh që Porti i Durrësit të kthehet në një port jahtesh. Nuk jemi kundër që të kalojë në një marinë detare. Projekti i Marinës nuk shkonte më shumë se 20 milionë euro. Pra jo më shumë se 1 % të vlerës. Pra nga 2.1 miliardë euro, nuk shkonte më shumë se 20 milionë euro. E gjitha kjo ka qenë një koperturë për të mbuluar vjedhjen e madhe. Kush është vjedhja e madhe, është vjedhja e tokave e pronave të portit, që sipas revistës Monitor shkon në 3 miliardë euro”, u shpreh Cara.
Igli Cara tregoi edhe për problematikat e mjedisit në Portin e Durrësit, ku nxori edhe një video nga Shkozeti, që tregonin një kanal të ujërave të zeza dhe një ndotje të madhe. Krah videos Cara thotë se njësoj si pamjet e publikuara në Shkozet është situate në të gjitha zonat e Durrësit ku kalonte ai kanal.
Sipas tij ndotja mjedisore rrezikon përditë jetët e qytetarëve, të cilëve u bëri thirrje që të votojnë ndryshimin në 14 maj.
Postimi i Carës për ndotjen mjedisore:
Në cilën zonë të qytetit të Durrësit ndodhemi?
E vërteta është se pavarësisht se cilës lagje të Durrësit i përkasin këto pamje nga Shkozeti, të njëjtën situatë alarmante e gjen në të gjitha zonat e qytetit, ku kalon ky kanal.
Kjo ndotje kaq e lartë mjedisore rrezikon çdo ditë jetën e këtyre banorëve, duke mos u kufizuar vetëm në periferi, por duke u përhapur në të gjithë Durrësin. Në 14 maj bashkë bëjmë ndryshimin! Qyteti je ti!
Discussion about this post