Igli Tare, ish-drejtori sportiv i Lazios ka dhënë një intervistë të gjatë për “Corriere dello Sport”. Shumë tema të trajtuara, nga marrëdhënia me presidentin Lotito tek Immobile e më gjerë. Mendimi për Simone Inzaghi është i pashmangshëm, i përcaktuar nga vetë Tare si i paracaktuar:
“Është vëllai im, kemi kaluar 18 ose ndoshta 20 vite së bashku. E gjeta në vitin 2009 te Lazio, ishte trajner i të rinjve. Që aty besova do të kishte një karrierë të shkëlqyer si trajner”.
Te Lazio, shqiptari ndau blerjet e lojtarëve me Lotiton. Kështu, për shembull, mbron blerjet e Muriqit dhe Vavros, të cilat rezultuan të dështuara në Itali: “Ato e vuajtën futbollin e Sarrit, por para se të largoheshin donin t’i thonë lamtumirë dhe ta përqafonin. Mbaj mend që Maurizio më tha: Isha te Napoli, u dhashë jetën disave, por askush nuk më ka respektuar ndonjëherë si këta dy djem”.
Më pas shton se Inzaghi nuk e ka pëlqyer Caicedon në fillim, ndërsa keqardhja për Giroud është shumë e fortë: “Ai ishte i yni, vetëm se në fund, Chelsea e pengoi dhe nuk e la të largohej. I provova të gjitha për ta marrë te Lazio”.
Mbi blerjet e tij kryesore te Lazio: “Felipe Anderson, Milinkovic-Savic, Luis Alberto, Lucas Leiva, Klose, Lulic. Por edhe Brocchi, nënshkrimi im i parë. Jam shumë i lidhur me Cristian, me dashuri autentike, një njeri i ndershëm, i respektuar”.
Disa fjalë edhe për Immobile: “Kur vendosi rekordin e golave, i thashë: Ciro, do ta kuptosh atë që ke bërë vetëm kur gjithçka të ketë mbaruar. Ai është golashënuesi më i mirë në historinë e Lazios. Përulësia e tij është forcë dhe dobësi, duhet të ndiejë besimin e atyre që e rrethojnë çdo ditë. Disa vite më parë kaloi një periudhë të ngjashme. Qendërsulmuesi i Lazios është një rol i rëndë, por kam respekt të pakufishëm për të. Vetëm ndershmëria e tij do ta bëjë të kuptojë kur të jetë koha për ta mbyllur”. Igli Tare nuk flet shumë për të ardhmen e tij: “Unë jam një qytetar i botës, familja ime në çdo rast do të jetojë në Romë”.
Discussion about this post