Ikin dritat në pikën kufitare, krijohet fluks automjetesh në Kapshticë dhe Qafë Thanë

Mesditën e sotme është regjistruar një numër i lartë udhëtarësh dhe pritje të gjata në dy pikat e kalimit kufitar të Kapshticës dhe Qafë Thanës.

Sipas informacioneve autoritetet doganore konfirmojnë se në Qafë Thanë janë krijuar radhë për shkak të shkëputjes së energjisë elektrike ndërsa aktualisht po punohet me gjenerator.

Aktualisht janë duke punuar 2 sportele në dalje dhe 3 në hyrje ndërsa sa i përket Kapshticës edhe në këtë pikë kufitare ka patur fluks të lartë dhe radhë të gjata për shkak të mosfunksionimit të sistemit.

Vargu i automjeteve në pritje për të ardhur në Shqipëri është shumë i gjatë pasi pala greke po punon me një sportel përgjatë gjithë ditës.