IKMT sot zbarkoi në Jalë për të shembur bizneset dhe pronat. Ndërhyrja ka qenë e papritur për banorët të cilët kanë treguar se nuk kishin marrë asnjë lajmërim lidhur me këtë ndërhyrje. Tronditje e madhe ka qenë për pronarin e një restoranti i cili është shkrehur në lot pasi IKMT i ka shembur bizneset edhe pronat. Kjo është hera e dytë që ai, haset me fadromat e IKMT-së, pasi edhe në vitin 2018 pronat e tij u shembën. Ai është shfaqur i ulur poshtë një peme dhe i pamundur kundrejt, me kokën ulur e i heshtur. Ndërkohë që forca të shumta të policisë kanë rrethuar zonën, familjarët e tjerë të kësaj familjeje, shpërthejnë në mallkime kundrejt kryeministrit.
“Ju lutem të gjitha atyre që kanë vënë dorë në këtë banesë në këtë truall në këtë shtëpi e të merren vesh të heqin dore, se nuk e kanë idenë me kë kanë të bëjnë. Unë betohem në Bibël, ai është një armik. Rama është një pjellë nepërkash”, tha motra e pronarit të restorantit.
“I kam me dokumente të sakta që në ’89. Ua kam treguar dokumentet kanë ardhur të na asgjësojnë. Tani jemi në rrugë, kanë bërë krim, krim”, është shprehur një nga pronaret.
Banorët i kanë rindërtuar sërish pronat, pasi pretendojnë se kanë një vendim të gjykatës së Shkallës së Parë që tregon se nuk duhen shembur këto prona. Ndërsa nga ana e IKMT pretendohet se vendimi është hedhur poshtë nga Apeli dhe është dhënë e drejta e shembjeve.
