Gjykata e Tiranës ka reaguar për mjekun Edmond Gashi, i cili u largua nga dera e ndaluar me vrap, pas seancës për vlerësimin e masës së sigurisë ndaj tij.
Në një njoftim sqarues, Gjykata e Tiranës bën të ditur se “me përfundimin e seancës gjyqësore, pasi gjyqtarja ka lënë sallën e gjyqit, po kështu me radhë pas saj edhe prokurori, avokatët, si dhe vetë personat nën hetim, shtetasi E.G., teksa ka qënë në korridorin e katit të parë të gjykatës, duke përfituar nga një moment i vetëm në të cilin një punonjëse e gjykatës ka qënë duke dalë në rrethana krejtësisht rastësore nga dera e cila shërben për hyrjet dhe daljet e autorizuara vetëm të gjyqtarëve dhe punonjësve të gjykatës (me karta të posaçme), ka dalë i shoqëruar edhe nga një shtetas tjetër, duke u larguar me vrap, i pa shoqëruar nga asnjë punonjës i policisë së shtetit”.
Gjykata thotë se policia duhej po ashtu të shoqëronte mjekun për në seancën gjyqësore.
“Në datën 27.06.2024, për paraqitjen dhe pjesëmarrjen e tij në seancën e caktuar për ‘Komunikimin e masës së sigurimit personal të caktuar në mungesë nga Gjykata’, në zbatim të nenit 248 të K.Pr.Penale, personi nën hetim E.G., do të duhej të ishte i shoqëruar nga punonjës të policisë së shtetit, të cilët në zbatim të vendimit të gjykatës si dhe në referim të nenit 237 të K.Pr.Penal, duhet të ndjekin dhe të zbatojnë me përpikmëri vendimet e gjykatës, si dhe zbatueshmërinë e masave të sigurimit”, thuhet në njoftim.
Megjithatë, në hyrje të gjykatës, mjeku nën hetim u pa të ishte i pashoqëruar nga asnjë efektiv policie.
Gashi u paraqit këtë të enjte në Gjykatën e Tiranës, e cila la në fuqi masën e sigurisë “arrest shtëpie”, pasi akuzohet për “shpërdorim detyre” në skandalin e Onkologjikut.
Ai u paraqit në gjykatë rreth orës 10:30, ndërsa në hyrje ku e prisnin gazetarët nxitoi për t’iu shmangur dhe tha: Bëj vetëm punën. Ndërkohë, pas gati 100 minutash në gjykatë, ai doli nga ana e pasme duke vrapuar.
Gjykata Penale e Tiranës la në fuqi masat e sigurisë për mjekët dhe specialistët e Onkologjikut, të cilët akuzohen se drejtonin pacientët me sëmundje tumorale drejt klinikave private. Sipas Prokurorisë, këta persona, në bashkëpunim me njëri-tjetrin kanë “shpërdoruar detyrën”.
Discussion about this post