Ditën e sotme Inspektori i Lartë i Drejtësisë ka finalizuar hetimin disiplinor ndaj gjyqtarëve të Apelit Vlorë Petrit Alia dhe Nazmi Troka. Ky vendim është marrë në kuadër të kërkesës së KLGJ për rikthim për hetim pranë ILD-së, të vendimit të arkivimit të hetimit nga Inspektorati i Këshillit të Lartë të Drejtësisë.
Sipas dokumentit të publikuar nga ILD, ndaj tyre është vendosur masa reduktim i pagës me 40% për 12 muaj, pasi kanë kryer shkelje procedurale. Procedurat e hetimit për dy gjyqtarët ka nisur nga ankesa e një shtetasi , i cili denoncon se Petrit Alia dhe Nazmi Troka kanë shkelur rregullat për gjykimin e një të pandehuri që kërkonte lirimin nga burgu.
“Shtetasi J. XH, me nismën e të cilit ka filluar hetimi disiplinor, ka ankimuar më 26.09.2018 vendimin e Inspektoratit të KLD-së, për arkivimin e ankesës së bërë prej tij, ndaj magjistratëve P.A. dhe N.T. Komisioni i përkohshëm i KLGJ-së për shqyrtimin e ankimeve kundër vendimeve të Inspektoratit Këshillit të Lartë të Drejtësisë, më 16.07.2019 vendosi pranimin e ankimimit,
Është konstatuar se bazuar në procedimin penal të regjistruar në vitin 2015, mbi bazën e kallëzimit të shtetasit J.Xh. për “Heqje të paligjshme të lirisë” Gjykata e Rrethit Vlorë ka caktuar masën e sigurimit “arrest në burg”, ndaj R.A., masë e cila nuk është ekzekutuar. Në datën 21.08.2016, i pandehuri/kërkuesi R.A i kërkon Gjykatës zëvendësimin e masës së sigurimit, kërkesë që u mor në shqyrtim nga një gjyqtar i gatshëm dhe jo trupi gjykues, që po shqyrtonte themelin e çështjes.
Më 22.08.2016, Gjykata e Rrethit Vlorë, vendos pranimin e kërkesës së kërkuesit R.A. dhe zëvendësimin e masës së sigurimit “arrest ne burg”, me masën e sigurimit “detyrim paraqitje në policinë gjyqësore”. Pas ankimit të Prokurorisë së Rrethit Gjyqësor Vlorë, më datë 22.09.2016, Gjykata e Apelit Vlorë vendos: “Lënien në fuqi të vendimit të Gjykatës së Rrethit Gjyqësor Vlorë. Prokuroria pranë Gjykatës së Apelit Vlorë ushtron rekurs, duke kërkuar Urdhërimin për vendosjen e të pandehurit R.A. nën masën e sigurimit “arrest në burg””, thuhet në vendim.
Në këtë kuadër, duke qenë se dy gjyqtarët kanë shkelur rregullat e profesionalizmit, ILD mori masat e nevojshme ndaj tyre.
