Mjeku Ilir Alimehmeti ka deklaruar se pandemia po shkon drejt shuarjes. Përmes një postimi në facebook ai ka publikuar të dhënat, të cilat tregojnë se dy javët e para të këtij muaji kanë qenë piku i valës së katërt në Shqipëri, ndërsa tani ka filluar zbutja e kurbës.
Sipas mjekut, këtë e vërtetojnë bilanci ditor i publikuar nga Ministria e Shëndetësisë, ndërsa pritet që në dy javët në vazhdim të ndjehet rënia e vërtetë e shifrave. “Vala Delta po thyhet miqtë e mi!
Më 30 gusht 2021 kemi përllogaritur që piku i valës Delta në Shqipëri do të arrihej ndërmjet datave 5 dhe 15 shtator 2021! Më 14 shtator pamë sinjalet e para të fillimit të rënies, me rënien për herë të parë të rasteve aktive (-147). Megjithatë, tashmë e kemi mësuar që duhet të presim të paktën një javë dhe idealisht dy javë për të qenë më të bindur për trajektoren. Sot, datë 23 shtator 2021, të gjithë indikatorët epidemiologjikë tregojnë qartë fillimin e rënies që javën e kaluar!
Në detaj: Po bie mesatarja e rasteve të reja në bazë 7 ditore! Po bie numri i rasteve aktive! Po bie mesatarja e përqindjes së pozitivitetit të testimeve në bazë 7 ditore!
Po bie incidenca dyjavore e rasteve të reja për 100.000 banorë!
Kujdes tani miqtë e mi, sepse aksidente në mal ndodhin më shumë gjatë zbritjes se sa gjatë hipjes”, shkruan ai.
Alimehmeti iu bëri thirrje qytetarëve që të vijojë të tregohen vigjilentë dhe të ruajnë higjienën personale dhe distancimin social.
E.H/ gijotina.com/
