Për analistin Ilir Demalia, nisja e bisedimeve dhe përmirësimet e Shqipërisë, është bërë një refren e i përsëritur që asnjëherë nuk ecën përpara. Gjatë një interviste televizive ai tha se, ne nuk kemi përmirësuar komponentët kryesorë për t’u pranuar në BE, madje deformojmë edhe ato pak reforma që arritëm.
“Nisja e bisedimeve dhe përmirësimet e Shqipërisë, është bërë si kënga e kukuvajkës që kemi kaq shumë vjet që e dëgjojmë. Ne kemi çeduar në të gjitha drejtimet. Borrell tha se zgjerimi duhet të jetë në bazë të meritave dhe funksionit të ligjit. Të gjitha këto komponentë nuk funksionojnë në Shqipëri. Edhe ato reforma që kishin filluar u kthyen e kokë mbrapsht. Sundimin e ligjit e shohim se çfarë bëhet me korrupsionin dhe trafiqet. Vendi mbahet përmes korrupsionit dhe trafiqeve”, deklaroi ai.
Sipas analistit, ne nuk mund të futemi ne BE, kur Shqiptarët janë populli më i varfër, pasi me një rrogë nuk përballojmë as nevojat bazë. Sipas tij vendi ynë është në kolpas dhe nuk po bën hapa para.
“Ata njerëz që jetojnë më rroga në Shqipëri nuk përballojnë dot biçikletën, jo më makinë. Vendi është përfshirë nga një informalitet që jetohet sot për sot, por pa një shtet të së drejtës. Këtu nuk flitet për shtet të së drejtës, kur njerëzit politikë zihen për një vend pune dhe ndërrohet administrata pas zgjedhjeve. Sistemi i drejtësisë është në kolaps. Kemi sukses të madh që kemi 7 anëtarë në kushtetuese, por korrupsioni në gjykata është llahtar”, u shpreh ai.
Demalia tha se media është e cenuar dhe e kapur nga oligarkikë ose janë të lidhur me pushtetin.
