Kryetari i Partisë së Lirisë, Ilir Meta, ka reaguar ndaj vendimit të gjyqtarit, Erjon Çela për të mos e liruar nga masa e sigurisë. Në një deklaratë të publikuar në rrjetet sociale, Meta e quajti gjyqtarin “noter të SPAK-ut” dhe e akuzoi SPAK-un për një “farsë gjyqësore” të ndërtuar pa prova.
Meta thekson se argumenti i SPAK-ut, sipas të cilit lirimi i tij si kryetar partie mund të intimidonte dëshmitarët, është “mashtrim publik”.
Ai pretendon se asnjë nga dëshmitarët e përmendur nga SPAK-u nuk janë anëtarë të Partisë së Lirisë.
“E theksoj se përveç Petrit Vasili, asnjë tjetër nga dëshmitarët e SPAK-ut nuk është anëtar i Partisë së Lirisë sot. 𝐄𝐧𝐝𝐫𝐢𝐭 𝐁𝐫𝐚𝐢𝐦𝐥𝐥𝐚𝐫𝐢, edhe falë Dumanit, dihet botërisht se është bërë “rilindas” i thekur dhe ishte në listën e deputetëve të Partisë Socialiste. 𝐄𝐫𝐢𝐨𝐥 𝐁𝐫𝐚𝐢𝐦𝐥𝐥𝐚𝐫𝐢, është shkarkuar nga Partia e Lirisë që në Janar 2024 për veprimtari të dyshimtë dhe është pjesë e “Rilindjes”. Madje ishte edhe numërues i votave të saj në zgjedhjet e fundit për Partinë Socialiste. 𝐄𝐥𝐞𝐧𝐚 𝐆𝐚𝐜̧𝐞, ish-financerja e LSI për 20 vite që nga themelimi është larguar në mënyrë të çuditshme në pranverë të vitit 2024 dhe pa dorëzuar detyrën e saj me shumë përgjegjësi, për të cilën i është bërë edhe thirrje publike disa herë në atë kohë. Ajo është punësuar sipas asaj vet në biznesin e Endritit (Braimllarit). 𝐙𝐧𝐣. 𝐌𝐢𝐫𝐞𝐥𝐚 𝐌𝐞𝐫𝐤𝐨, ish-kryefinanciere e LSI para 10 vitesh. Prej 6 vitesh nuk është pjesë e LSI, por është pjesë e administratës publike. 𝐋𝐮𝐚𝐧 𝐑𝐚𝐦𝐚, ish-Sekretar i Përgjithshëm i LSI, i vetëlarguar që në gusht 2021.”, shkruan Meta.
Meta pretendon se vendimi për masën e sigurisë është një “pengmarrje” e bërë për interes të “regjimit mafioz të Edi Ramës”. Ai paralajmëroi se do të bëjë publike të gjitha “mashtrimet” e SPAK-ut pas seancës paraprake të gjykimit.
“Zero prova, zero fakte penale dhe zero dëshmitarë kundër Ilir Metës,” përfundoi Meta, duke bërë thirrje Partisë së Lirisë që të “përshkallëzojë denoncimin e aferave korruptive ulëritëse të Edi Ramës dhe kryeaferën e tij: Kapjen e Drejtësisë.”
Discussion about this post