Presidenti Ilir Meta vazhdon të kritikojë dhe t’i tërheq vëmendje qeverisë në lidhje me nivelin e lartë të borxhit publik. Përmes një postimi në rrjetin social Facebook ai shkruan se, qeveria jonë duket hapur që abuzon pasi merr borxhe jo për të përmirësuar vendin por për t’u futur më shumë në krizë. Ai tregon se në 2 vjet prosperiteti në vendin tonë është përkeqësuar 3 herë, duke paralajmëruar kështu një katastrofë për vitet në vazhdim.
“Futesh në borxh për t’u përmirësuar dhe jo për t’u përkeqësuar! Në të kundërt ndodh me vendin tonë. Sipas Indeksit të Prosperitetit, të përgatitur nga Legatum Institute, institucion i pavarur prestigjoz i përpunimit të statistikave që vijnë nga burime të besueshme, rezulton se vetëm brenda dy viteve të fundit Shqipëria ka përkeqësuar me tre shkallë treguesin e prosperitetit, duke rënë në vendin e 69-të për vitin 2021, nga vendi i 66-të, që ndodhej në 2019”, shkruan ai.
Sipas Metës, në krahasim me vendet e tjera europiane ne kemi probleme të mëdha fiskale dhe numër shumë të ulët të punësimit. Ai i bënë thirrje qeverisë të veprojë pasi përkeqësimi i ekonomisë vendase nuk ndalet, por zgjerohet çdo vit.
“Në terma konkretë, qëndrueshmëria fiskale, dinamizmi ekonomik, fuqia punëtore janë ndër më të ulëtat në Europë. Në pikiatë rezultojnë cilësia e qeverisjes, e ekonomisë, zbatimi i ligjeve, respektimi i të drejtave të pronësisë, zbatimi i kontratave dhe detyrimeve. Cilësia e jetës së qytetarëve shqiptarë ka rënë në tërësi dhe pothuajse jemi ndër të fundit në botë për besimin ndaj institucioneve. Gjendja është e rëndë dhe përkeqësimi nuk ndalet! Reflektimi i menjëhershëm, efektiv dhe i përgjegjshëm është domosdoshmëri”, shkruan Meta.
Edhe ditëne djeshme në një konferencë për mediat, presidenti ngriti si shqetësim nivelin e lartë të borxhit, ndërsa i bëri thirrje qeverisë që të tregohet më transparente.
Discussion about this post