Personat që ekstradohen nuk janë sekret. Ata janë në listat e personave të kërkuar që publikohen INTERPOL për dijeni të publikut brenda dhe jashtë vendit. Po ashtu, arrestimet e tyre ligjërohen në gjykata dhe bëhen publike vendimet. Kurse biletat e udhëtimit të tyre për në Tiranë qenkan sekret!
Në fakt, Drejtoria e Përgjithshme e Policisë ka shfrytëzuar Nr.36/2020, “Për prokurimet në fushën e mbrojtjes dhe sigurisë” për të prokuruar 270 milionë lekë bileta për ekstradimet e vitit në vazhdim. Në këtë mënyrë eliminohet konkurrenca dhe paratë mbeten në rrethin e ngushtë të miqve të “Rilindjes”.
Këtë veprim të Drejtorisë së Përgjithshme të Policisë e mësuam nga njoftimi i fituesit “KELVIN TRAVEL”, sh.p.k me NIPT L71607034L, shpallur në Agjencinë e Prokurimit Publik.
Mënyra e zgjedhur për prokurim ka qenë “Procedurë e kufizuar”, nëpërmjet marrëveshjes kuadër me një operator ekonomik, kur të gjitha kushtet janë të përcaktuara. E thënë më thjesht, stafi i Ilir Prodës ka marrë në telefon Mirela Andonin, pronare e agjencisë turistike ‘Kelvin Travel” shpk që të paraqitet për të marrë fondin e caktuar për kontratën me objekt “Blerje bileta për të ekstraduarit dhe punonjësit shoqërues”. Për këto bileta është përllogaritur vlera 27.000.000 lekë pa TVSH. Kjo shifër gjigante lë të kuptohet se të ekstraduarit vijnë të gjithë nga Dubai, Amerika Latine, Australia ose Zelanda e re. Këta VIP-ë të krimit, me siguri udhëtojnë në klasin mbretëror!
Operatori ekonomik: “KELVIN TRAVEL”, sh.p.k, me ofertë 27.000.000 lekë pa TVSH është i vetmi që ka marrë pjesë në këtë procedurë. Pavarësisht se është një tender ‘sekret’, ligji përcakton se duhen njoftuar të paktën dy operatorë ekonomik.
Nuk është e rastësishme që kjo agjenci të marrë super tenderin nga Policia e Shtetit. “Kelvin Travel” është një biznes me lidhje të forta në qeveri. Në fillimet e veta, agjencia ishte modeste. Ky biznes është krijuar në vitin 2017 nga Aida Kodrasi. Në vitin 2019, kjo kompani me humbje u ble për 100 mijë lekë nga Mirela Andoni.
Menjëherë kurba e të ardhurave të “Kelvin Travel’ mori përpjetë falë kontratave të biletave me Erion Veliajn, i cili evidentohet të ketë prorositur 26 herë në këtë agjenci. 19 kontrata të tjera janë me OST, një shoqëris shtetërore drejtuesit e së cilës preferojnë të fluturojnë me “Kelvin Travel”. Këtu futen edhe disa institucione të tjera, si ERE, OSHEE, HEC Lanabregas, IDENTITEK.
“Kelvin Travel” ka pasur edhe tri kontrata me Operatorin e Blerjeve të Përqendruara, kur ky ent varej nga ministri i Brendshëm, Fatmir Xhafaj.
Por kontrata për biletat e VIP-ëve të krimit është më e madhja që arrin të sigurojë Mirela Andoni, falë një procedure “sekrete” të Ilir Prodës.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post