Ilir Proda është emëruar zyrtarisht Drejtor i Përgjithshëm i Policisë së Shtetit. Vendimi u mor sot në mbledhjen e Këshillit të Ministrave dhe u lajmi bë i ditur nga ministri i Brendshëm pas mbledhjes së qeverisë në një komunikim për mediat.
Ministri Ervin Hoxha paralajmëroi edhe ndryshime në rang drejtuesish te Drejtoritë Vendore të Policisë.
“Këshilli i Ministrave mori një vendim shumë të rëndësishëm, me propozimin e Ministrit të Brendshëm, Këshilli i Ministrave miratoi Drejtorin e ri të Përgjithshëm të Policisë së Shtetit, zotin Ilir Proda. Pas një konkurrimi mbi më shumë se 10 drejtues të lartë policie dhe verifikimeve të bëra nëpërmjet procesit të pastërtisë së figurës së kandidatëve. Menjëherë pas emërimit të tij si Drejtor i Përgjithshëm i Policisë së Shtetit do të hapim konkurrimin, për një proces të ri, sa i përket gjithë drejtuese të policisë në qarqe”, tha ai.
A e përligj imazhin e Drejtorit të ri të Policisë së Shtetit fakti që SPAK më herët i ka sekuestruar telefonin për të bërë verifikime lidhur me dekonspirimin e një operacioni sa i përket bandave të Elbasanit?
Ministri Hoxha u përgjigj: Fakti që të gjitha organet ligjzbatuese u pyetën në një kohë rekord, po ashtu dhe përgjigjja e tyre ishte shumë e shpejtë, kandidaturat janë verifikuar nga çdo organ ligjzbatues dhe pastërtia e tyre është në përputhje të plotë me ligjin. Ky proces konsiderohet transparent, me integritet dhe Drejtori i ri i Përgjithshëm i Policisë së Shtetit i ka kaluar këto etapa verifikimi.
Ilir Proda u propozua për drejtor të Policisë së Shtetit nga ministri i Brendshëm Ervin Hoxha, ditën e hënë, më 30 Shtator 2024. Propozimi ju dërgua Kryeministrit për të vendosur firmën përfundimtare. Ilir Proda 41 vjeç u zgjodh nga lista mes 5 kandidatëve me pikët më të larta që ishin në garë për kryepolic. Proda do të pasojë në këtë detyrë Muhamet Rrumbullakun.
Lexo edhe:
Discussion about this post