Kryebashkiaku i Pogradecit, Ilir Xhakolli, i jep tenderin 50 milionë lekë kompanisë me ofertën më të shtrenjtë. Kryetari e kishte me urgjencë për të blerë llamba për ndriçimin e qytetit para zgjedhjeve, prandaj ka urdhëruar tenderin e mëposhtëm të blihen 5350 llamba led plus aksesorë elektrikë.
Më datë 18 nëntor 2024, Bashkia Pogradec ka hapur garën për prokurimin me objekt ‘Blerje materiale elektrike’. Janë treguar të gatshme 4 kompani me ofertat e tyre për të marrë pjesë në këtë garë, por 3 janë përjashtuar në fazën e parë.
Komisioni i emëruar nga Xhakolli raporton se këto oferta nuk mund të vazhdonin për në fazën finale të prokurimit për shkak se kishin mungesë dokumentacionesh. Kështu, një Person Fizik nuk kishte paraqitur në afat dokumentet fizike. Eliminimi i kësaj oferte që është edhe shumë ekonomike duket i dyshimtë, sepse personi i mësipërm, sipas dokumenteve, ka eksperiencë të gjatë në këtë sektor.
Ndërkohë, “Xheri’s Company” shpk nuk kishte paraqitur pasqyrat financiare të tre viteve të fundit. Po si mund të ketë bilance kjo kompani, kur është krijuar në mars 2024?! Pra, kemi një kompani që merr pjesë formalisht në tender, sepse dihet qysh në fillim se nuk plotëson asnjë kusht.
Në fakt ligji mbi prokurimet përcakton se procedura duhet të garantojë konkurrencë të drejtë, ndërsa në këtë tender procedura është krejt fiktive.
Kështu, në fazën finale ka mbetur vetëm oferta e operatorit “2 AS INVEST” shpk, në pronësi të Suhejl Tikvina.
Tenderi iu bë dhuratë këtij biznesi pa garë fare, pasi nuk kishte konkurrentë përballë. Për këtë Open Data Albania i ka vendosur tenderit “Flamurin e Kuq”, që është shenja e riskut të korrupsionit. “Skualifikim i të gjithë operatorëve konkurrues perveç fituesit”, është përshkrimi i monitoruesit për këtë procedurë.
Sipas dokumentit të mësipërm që është pjesë e formularit të shpalljes së fituesit, mësojmë se “2AS Invest” shpk kishte ofertën më të shtrenjtë, por kjo nuk i ka bërë përshtypje komisionit.
Shtojmë gjithashtu se pronari i firmës Tikvina është një biznesmen që është futur vitet e fundit në garat e tenderave, por gjithmonë grumbullon miliona duke u favorizuar nga zyrtarët. Kompania është hapur në vitin 2021 dhe tashmë merr me lehtësi tenderat edhe pse nuk zotëron asnjë licencë.
Kontrolli që kryem në QKB tregon se kompania fituese nuk ka licenca aktive.
Tikvina pak muaj më parë është gostitur me një tender nga kryetarja e Lushnjes, Eriselda Sefa. Bëhet fjalë për prokurimin me numër reference REF-02071-04-19-2024 dhe objekt ‘Blerje Materiale Elektrike” dhe fond limit 151 milionë lekë.
Në fakt, paratë u shpenzuan për blerjen e disa shtyllave elektrike dekorative. Në dokumente listoheshin si kritere edhe posedimi i disa licencave që “2 AS INVEST” nuk i zotëronte, por sërish pa asnjë konkurrent përballë kjo firmë u shpall fituese. Duket se një dorë më e fortë qëndron pas biznesmenit 26 vjeç, që favorizohet nëpër tenderat publikë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post