Elisabeta Imeraj, ish- Prokurore e Krimeve të Rënda, tha se mbledhja e Këshillit të Mandateve duhej të zhvillohej me dyer të hapura për shkak të interesit të lartë publik.
Imeraj tha se SPAK me kërkesën e tij për të ruiajtur sekretin hetimor është në rregull le të themi me procedurat, por kemi të bëjmë me aferën e inceneratorëve që ka një interes të lartë publik.
“Mund të zhvillohej me dyer të mbyllura vetëm ajo pjesa ku SPAK paraqiste provat dhe faktet”, tha Imeraj.
Duke bërë një paralelizëm mes rastit kur kërkohej arrestimi i Saimir Tahirit dhe rastit të Arben Ahmetajt, Imeraj tha se në rastin e ish-ministrit të Brendshëm, Kuvendi vendosi të mos pranojë kërkesën e Prokurorisë.
“Për rastin e Ahmetajt ne duhet të presim një vendim, megjithëse nga Partia Socialiste janë dhënë sinjale se nuk do të bëhen mburojë”, tha Imeraj.
Sipas saj, nëse Gjykata do të vendosë një masë sigurie ndaj deputetit Ahmetaj, atëherë mund të shpallet në kërkim ndërkombëtar, nëse ai nuk paraqitet vullnetarisht.
“Nëse Kuvendi i jep autorizimin SPAK për arrestimin, atëherë është Gjykata që jep vendimin e saj, pra do të vlerësojë nëse duhet arrestuar ose jo. Nëse vendoset arrestimi, atëherë gjithmonë vendimi i Gjykatës shoqërohet edhe me një shpallje në kërkim, nëse personi nuk paraqitet, ose nuk gjendet”, tha ajo.
Sipas Imerajt, hetimi vijon edhe pse subjekti i dyshuar mund të paraqitet ose jo.
Discussion about this post