Kukësi nuk ia ka dalë të fitojë kundër Egnatias dhe mbetet në vendin e tretë në klasifikim, pasi dueli i sotëm përfundoi 1-1. Ky ishte barazimi i tretë për verilindorët. Për rrogozhinasit që po tentojnë të qëndrojnë në Superiore, kjo pikë është shumë e vlefshme për objektivin e tyre.
Kukësi kishte një mundësi të mirë shënimi që në minutën e dhjetë, por Basa në zonë goditi jashtë. I njëjti lojtar tentoi edhe më pas për të realizuar, topi gjeti mbrojtësin Krivanjeva.
Lulaj ishte i radhës që rrezikoi për verilindorët, kurse Egnatia vetëm pas gjysmë ore lojë u shfaq dhe mund të kishte shënuar me Bledar Lilën.
Në minutën e 32-të ndeshja u zhbllokua. Ndreca u ndal nga trau dhe Gjelbrim Taipi aty afër nuk fali dhe me një lëvizje akrobatike e ndëshkoi portierin Hasanbelli.
Në fillim të pjesës së dytë Egnatia pretendoi për një penallti, por nuk mendoi ashtu arbitri Myrtja. Një minutë më pas, në të 63’, Jackson u ndal nga traversa.
Egnatia ia doli të barazoi me anë të Demir Imerit në të 78’, ndërsa Kukësi 10 minuta më pas festoi dhe u kthye me këmbë në tokë, pasi me VAR iu anulua një gol i shënuar nga Bruno Lulaj.
Discussion about this post