Inspektoriati i Mbrojtjes së Territorit ka nisur dje një aksion të befasishëm në fshatin Mënik të njësisë administrative Ndroq, disa kiliometër larg Tiranës, duke shembur çfarë i ka dalë përpara.
Shembja ka përfshirë kotecë pulash, hambarë për misër, magazina për mbajtjen e barit, të cilat pretendohet se janë ndërtuar pa leje nga banorët të cilët kanë një jetë që jetojnë në këtë fshat.
Përveç shembjeve të paparalajmëruara, banorët janë gjobitur dhe me shuma të kripura, që i kalojnë 3 milion lekë të vjetra, si të akuzuar për ndërtime pa leje.
Në një intervistë për “TVA News”, Ilir Pojana, banor i fshatit Mënik, tregon se si u gjobit 6 milione lekë, të cilat nuk ka mundësi t’i paguajë. Krimi që ka bërë Iliri është se ka ndërtuar një kotec për pulat e tij para shumë vitesh.
Koteci iu prish, e bashkë me të iu mor edhe uji i një pusi të cilin e kishte hapur vite më parë. Pusi iu prish dje, edhe ky si ndërtim pa leje.
Iliri thotë se ky është një aksion me porosi, pasi prishjet kanë qenë selektive. Sipas dyshimeve të banorëve, urdhri është dhënë nga Bledi Miniku, një ish-zyrtar i Ministrisë së Bujqësisë, i cili kërkon të përvetësojë pronat e banorëve.
Aksioni vjen në një kohë kur në Tiranë gëlojnë ndërtimet pa leje, ndërkohë që aksioni për lirimin e hapësirave publike ka dështuar, pasi pronarët e lokaleve kanë rikthyer karriget nëpër trotuare.
Discussion about this post