Pas lajmit se SPAK ka nisur ekzekutimin e urdhër arresteve të para për skandalin e inceneratorëve, janë ngritur pikëpyetje nëse në pranga kanë rënë dhe disa deputetë të PS që janë denoncuar nga PD.
Në rastin e deputetëve, SPAK duhet të marrë leje nga Kuvendi, ndërkohë që mësohet se një kërkesë e tillë nuk ka mbërritur pranë Komisionit të Mandateve dhe Imuniteteve.
“Ky është momenti i dytë që SPAK firmos urdhër-arreste, pas atij për ish-ministrin Lefter Koka. SPAK ka tre dosje, një për Elbasanin, një për Tiranën dhe tjetri për Fierin. Tashmë janë arrestime të zyrtarëve të rolit bazë, që janë marrë me çështje të administrimit. SPAK nuk është marrë më çështjen e parave, ku në rastin e ish-ministrit Koka dyshohet se kishte përfituar një shumë të konsiderueshme parash në formën e ryshfetit. SPAK është marrë me procedurën që është ndjekur për inceneratorin e Fierit, ku ka rezultuar se ka pasur shkelje të rënda. Duke qenë një çështje e shtrirë në kohë, që nga oferta e pakërkuar, SPAK është kapur moment pas momenti. Ka pasur sinjalizim për arrestime dhe për inceneratorin e Tiranës”, tha gazetarja Klodiana Lala për ‘News24’.
Në total, mësohet se janë lëshuar 13 urdhër arreste, ndërsa pas ekzekutimit të tyre, pritet që SPAK të dalë me njoftim zyrtar për arrestimet. Kujtojmë se në kërkim për këtë çështje janë shpallur Mirel Mërtiri, Stela Gugallja si dhe Klodjan Zoto, ndërsa është arrestuar ish-ministri Lefter Koka.
Discussion about this post