Kreu i Partisë Demokratike, Lulzim Basha, foli jashtë dyerve të Kuvendit për aferën më të madhe korruptive të denoncuar nga opozita, atë të inceneratorëve, ndërsa tregoi pse sipas tij, komisioni hetimor është i rëndësishëm.
Basha deklaroi se ky komision ka zbërthyer mekanizmin si janë vjedhur 400 milionë euro për tre inceneratorët, ku sipas kreut demokrat, përgjegjësi kryesor është Edi Rama.
“Fokusi ka qenë tek afera, që është vjedhja më e madhe e ndodhur në këto 30 vite. Komisioni Hetimor është i rëndësishëm, sepse ne kemi gjashtë vite e që denoncojmë. Komisioni ka bërë atë çfarë denoncimet e opozitës dhe të gazetarëve nuk arrinin ta bënin të plotë, ka zbërthyer mekanizmin si janë vjedhur këto para. Mekanizmi është i denjë për skenarët e mafies, ku të përfshirë janë gjysma e kabinetit qeveritarë, sekretari i kryeministrisë, drejtorë të rëndësishëm. Kur inceneratori i Elbasanit u denoncua, atë ditë që u denoncua në Prokurori, Edi Rama mblodhi grupin parlamentar dhe e çoi te inceneratori. Ky është rasti i parë në botë, që një grup parlamentar mblidhet te një vend grumbullimi plehrash. Nga aty Rama mori në mbrojtje një aferë kriminale. E rëndësishme është që ky komision po provon dita-ditës si ka funksionuar kjo aferë”, tha Basha.
Discussion about this post