Në një seancë maratonë që ka nisur që në orën 09:00 të mëngjesit, Komisioni Hetimor për inceneratorët ka marrë në pyetje disa përfaqësues të këtyre subjekteve. Ndër to, Florian Muçaj, anëtar i Komisionit të Prokurimit për inceneratorin e Fierit nuk ka pranuar të dëshmojë në Komisionin.
I pranishëm në Kuvend, Muçaj është shprehur se është marrë në pyetje nga Prokuroria e Posaçme kundër Korrupsionit dhe Krimit të organizuar (SPAK) e për këtë arsye nuk mund tu përgjigjet pyetjeve të deputetëve.
“Jam administrator i shoqërisë “Albpetrol”. Jam thirrur nga SPAK për prezencën time në komisionin e inceneratorit të Fierit kam dhënë dëshminë kështu që kam ardhur në respekt të këtij komisioni por nuk mund të vazhdoj më të jap dëshmi në lidhje me atë se çdo gjë që mund të them këtu mund të përbëjë prishje të hetimit që është duke u zhvilluar nga SPAK. Kam dhënë dëshmi para prokurorëve,” tha Muçaj.
Pas fjalëve të Muçaj, deputeti demokrat Lefter Gështenja tha se ai ka marrë udhëzime nga Partia Socialiste e se kjo gjë mund të vërtetohej duke hapur kamerat e korridoreve të Kuvendit.
Discussion about this post