Komisioni Hetimor për inceneratorët është mbledhur sërish sot ku në seancën e fundit për dëshmitarët po dëshmon kryeministri Edi Rama.
Në nisje të fjalës së tij, Rama i tërhoqi vëmendjen kryetares së komisionit Jorida Tabaku që të mos fyejë dhe ofendojë dëshmitarët. Ky i fundit iu referua termit “aferë” për çështjen e inceneratorëve dhe “grup i strukturuar kriminal”, ku tha se opinionet duhet të ndahen nga puna e Komisionit.
“Në ligjin për Komisionet Hetimore, Komisioni nuk mund të ngrejë akuza penale dhe të ushtrojë atributet e Gjykatës. Anëtarët e Komisionit nuk mund të fyejnë dhe të prekin dinjitetin e personave që thirren në Komision. Këtë e keni bërë në mënyrë të përsëritur dhe keni përsëritur akuzën e grupit të strukturuar kriminal. Unë kam ardhur si dëshmitar, ju ftoj të bëni punën tuaj dhe do t’ju sugjeroja të mos eksportoni debatin parlamentar dhe televiziv. Ky Komision është me mbështetjen time të plotë, opozita është lënë e plotë të bëjë ç’të dojë, të thërrasë kë të dojë dhe jam këtu të ndihmoj në zbardhjen e të vërtetës dhe vetëm të vërtetës. Respektoni ligjin edhe ju. Nëse bëni zgjedhjen e ditëve të tjera, do t’ju përgjigjem. Po kthehem te pyetja juaj. Ju folët për një aferë, unë nuk kam ardhur të zbardh asnjë aferë. Këtu e shprehni në rrjetet tuaja sociale, por këtu nuk mund ta shprehni. Këtu jeni në një Komision dhe keni thirrur një dëshmitar. Opinionet tuaja shprehini në raport, unë këtu nuk kam ardhur për asnjë aferë”, tha Rama.
Ditën e djeshme në Komision u dëgjuan dëshmitë e kryetarit të bashkisë së kryeqytetit, Erjon Veliaj, të sekretarit të përgjithshëm të këshillit të ministrave, Engjëll Agaçi dhe të Damian Gjiknurit.
Discussion about this post