Gjykata e Posaçme e Apelit ka ndryshuar vendimin për ish-ministrin e Mjedisit, Lefter Koka në lidhje me inceneratorin e Elbasanit dhe e ka dënuar atë me 10 vite burg duke i shtuar edhe akuzën e shpërdorimit të detyrës. Për shkak të gjykimit të shkurtuar, dënimi konvertohet në 6 vite e 8 muaj burg. Në Shkallën e Parë, Koka ishte dënuar me 5 vite e 6 muaj burg.
Edhe për Alqi Bllakon ka ndryshim vendimi, pasi Apeli i Posaçëm e ka shpallur fajtor për shpërdorim detyre duke e dënuar me 4 vite burg. Për shkak të gjykimit të shkurtuar dënimi i konvertohet në 2 vite e 8 muaj burgim. Në Shkallën e Parë, Bllako ishte shpallur i pafajshëm për shpërdorim detyre.
Për Klodian Zoton, Mirel Mërtirin, Stela Gugallen, Pëllumb Abeshin, Jonida Zeqon, Bardhyl Çabirin dhe Serafin Papën nuk ka ndryshim të vendimit dhe qëndron në fuqi ai i Shkallës së Parë: Klodian Zoto dhe Mirel Mërtiri u dënuan me nga 10 vjet burg – 6 vjet e 8 muaj burg me gjykim të shkurtuar. Për administratoren e shoqërisë “Albtek Energy” sh.p.k Stela Gugallja, u vendos 7 vjet burg – 4 vjet e 8 muaj me gjykim të shkurtuar. Me nga 4 vite burg u dënuan Pëllumb Abeshi dhe Jonida Zeqo që iu ulet në 2 vjet e 8 muaj burg për shkak të gjykimit të shkurtuar.
Ishte SPAK që pas vendimit të Shkallës së Parë të Gjykatës së Posaçme vendosi që të ankimonte vendimin.
“Jam i pafajshëm, ju po kërkoni të më dënoni mua si “peshkun e madh”, por nuk jam unë “peshku i madh”. Unë jam biznesmen dhe nuk kam pasur nevojë të më paguajë biletat e udhëtimit Mirel Mërtiri”, u shpreh Lefter Koka gjatë një prej seancave gjyqësore.
Koka është dënuar edhe për dosjen e inceneratorit të Fierit me 10 vite burg që për shkak të gjykimit të shkurtuar i ulet 1/3 e dënimit dhe përfundimisht u dënua me 6 vite e 8 muaj heqje lirie.
Ndaj Kokës është caktuar një masë e tretë sigurimi edhe për inceneratorin e Tiranës ku dyshohet për “shpërdorim detyre”.
Sa i përket ish-deputetit Alqi Bllako edhe ai është marrë i pandehur për inceneratorin e Tiranës ku akuzohet për veprën penale të korrupsionit në dy raste.
Për opozitën, koka e aferës së inceneratorëve është kryeministri Edi Rama. Megjithatë kreu i qeverisë jo vetëm që nuk është akuzuar nga SPAK, por nuk është pyetur asnjëherë lidhur me çështjen.
Përsa i përket anës procedurale, një kritikë e bërë nga ekspertët e fushës ka qenë ndarja e hetimit në disa çështje.
Discussion about this post