Inceneratori inekzistent i Sharrës shpërfaqi për herë të parë publikisht rivalitetin, i cili deri më tani ishte mbajtur i heshtur mes kryetarit të Bashkisë së Tiranës dhe zv.kryeministres dhe Ministres së Infrastrukturës, Belinda Balluku. Prej shumë muajsh përflitet në korridoret e politikës se Veliaj e Balluku janë në një luftë të heshtur mes tyre, se kush e kush t’i serviloset më tepër kryeministrit Edi Rama, me shpresë e secilit për t’u rreshtuar si pasues i krye-Rilindasit.
Ajo që ndodhi këtë të Premte të datës 15 Shtator 2023 në Këshillin Bashkiak të Tiranës tregoi më së miri se Balluku e Veliaj kanë nxjerrë “thikat” dhe po mundohen të plagosin politikisht sa më shumë njëri-tjetrin. Gjithçka lidhet me pagesat për depozitimin e mbetjeve në landfillin privat të Klodian Zotos e Mirel Mërtirit në Sharrë.
Kontrata koncesionare e nënshkruar në vitin 2017 mes Ministrisë së Mjedisit dhe kompanisë “Integrated Energy bv” parashikon, ndër të tjera, se autoriteti kontraktor qeveritar do të mbështesë financiarisht njësitë e qeverisjes vendore të qarkut Tiranë, në rast se këto të fundit nuk kanë buxhet të mjaftueshëm për të paguar fatyrat e depozitimit të mbetjeve, e përllogaritur në 29 euro për çdo ton plehra.
Prej vitit 2018, autoritet kontraktor për zbatimin e kësaj kontrate është Ministria e Infrastrukturës, e cila aktualist drejtohet nga Belinda Balluku.
Bashkia e Tiranës, gjatë 6-mujorit të parë të vitit 2023, ka shpenzuar të gjithë buxhetin vjetor të parashikuar për depozitimin e mbetjeve në landfillin e Sharrës.
Për këtë arsye, në Gusht 2023 i është drejtuar Ministrisë së Belinda Ballukut për t’i alokuar fond, me qëllim pagesat për kompaninë koncesionare. Balluku nuk i ka kthyer asnjë përgjigje Veliaj. Ose, më së paku, nuk ka mbështetur aspak nevojën e Veliajt për fonde shtesë. Kjo dallohet lehtësisht në kërkesën që Veliaj i drejton Këshillit Bashkiak për të modifikuar buxhetin vjetor dhe për ulur shpenzime në disa investime publike e për t’i kaluar si pagesë për plehrat.
Në shkresën e nënshkruar nga Erion Veliaj për Këshillin Bashkiak thuhet, ndër të tjera: “…Në kushtet e emergjencës, përballë njoftimit nga shoqëria për ndërprerjen e shërbimit të depozitimit të mbetjeve në rast mos-shlyerje të detyrimeve, lind e nevojshme që Bashkia e Tiranës të mbulojë nga të ardhurat e veta detyrimet për këtë kontratë, duke parashikuar fond të nevojshëm deri në fund të vitit 2023…”.
Diçitura: Shkresa e Veliaj për Këshillin Bashkiak
Kjo shtesë fondi përllogaritet në rreth 6 milionë euro, të cilat Bashkia duhet t’i shkëpusë nga fondet e veta për shpenzime të tjera, në mungesë të mbështetjes financiare nga qeveria, e konkretisht nga Belinda Balluku. Por, a ka mbajtur këtë qëndrim “bllokues” Balluku me iniciativën e saj personale? Është e vështirë për t’u besuar një variant i tillë, kur tashmë është e qartë për këdo se thuajse të gjithë njësitë e ekzekutivit, në qendër e në rrethe, kontrollohen me dorë të fortë nga kryeministri Edi Rama.
Pasojat për Veliaj
Përballja e Erion Veliajt me Këshillin Bashkiak e ekspozoi atë si një menaxher mediokër, një aspekt që ai mundohet ta mbulojë me propagandë. Bashkia e Veliajt, në 4 vitet e fundit, kur ka qeverisur pa opozitë në Këshillin Bashkiak, nuk ka raportuar asnjëherë problematikë të tillë me pagesat e faturave për depozitimin e mbetjeve.
Tashmë që landfilli i Sharrës është nën sekuestro nga SPAK, i menaxhuar nga një administrator shtetëror, si edhe Këshilli Bashkiak iu rikthye plularitetit politik, Veliaj ngriti duart dhe deklaroi “falimentin” përballë koncesionarit të Sharrës. Paaftësinë menaxheriale të Veliajt e zbuloi Balluku me një lëvizje të vetme, duke mos e ndihmuar me fonde shtesë për inceneratorin.
Në këtë mënyrë, Balluku e goditi kryebashkiakun e Tiranës pikërisht në pikën e tij më të dobët. Prej të paktën dy vitesh, opozita e konsideron kryetarin e Bashkisë së Tiranës si personin kryesor përgjegjës për kontratën abuzive me kosto koncesionare 128 milionë euro dhe me faturë 30-vjeçare që mund të arrijë në 1 miliard euro.
Në marsin e vitit 2017, Erion Veliaj, pa marrë më parë vendimin e Këshillit Bashkiak, u shpreh “dakord në parim” për projektin koncesionar të landfillit dhe inceneratorit të Sharrës.
Diçitura: Veliaj anashkaloi Këshillin Bashkiak dhe u shpreh dakord me koncesionin e Sharrës
Ky veprim i Veliajt është në kundërshtim flagrant me ligjin dhe ai, me shumë mundësi, sheh ëndrra me pranga, sidomos pasi Struktura e Posaçme Anti-Korrupsion (SPAK) ka në zhvillim hetimet për procedurën e dhënies me koncesion të landfillit të mbetjeve në Sharrë. Po ashtu, Veliaj është në qendër të akuzave të opozitës edhe për faktin se prej më shume se 6 vitesh po paguan faturën e plotë 29 euro për ton mbeturina, ndërkohë që koncesionari nuk ofron shërbimin e plotë, pasi mungon impianti i incenerimit të mbetjeve.
Për të gjitha këto arsye, Erion Veliaj tenton t’i shmanget përgjegjësive, duke u mbuluar nga enturazhi i tij mediatik e duke folur gjithnjë e më shumë për një Tiranë të pastër. Ai nuk flet asnjëherë për procedurat abuzive dhe, sidomos për faturat e fryra që u rëndojnë xhepave të qytetarëve të Tiranës.
Atë që nuk bën Veliaj, e bëri Balluku. Ajo e ekspozoi aq keq kryebashkiakun e Tiranës, sa ky i fundit u detyrua të shfaqë në publik, nëpërmjet Këshillit Bashkiak, emergjencën financiare për të paguar faturën e mbeturinave. Belinda Balluku, nga ana e saj, nuk është edhe aq e papërfshirë në aferën e inceneratorëve. Megjithatë, për momentin, zv.kryeministrja e ka lojën në dorë, përsa kohë Veliaj u detyrua t’i lutej për fonde shtesë. Dhe dështoi në mënyrë spektakolare.
Discussion about this post