Kryetari i Aleancës për Ardhmërinë e Kosovës, Ramush Haradinaj thotë se incidentet e ditëve të fundit në veri, janë tregues serioz se mund të ketë një skenar të pengimit të zgjedhjeve në veri, me pasoja edhe për sigurinë në atë zonë.
Refuzimi i Listës Serbe për të marrë pjesë në zgjedhjet lokale atje, tregon mungesën e gatishmërinë së palës serbe që të zbatojë marrëveshjen e arritur në Bruksel, sipas tij.
“Presidenti i Serbisë të heqë dorë nga destruktiviteti dhe t’i urdhërojë njerëzit e tij që të heqin dorë nga sulmet e dhunshme”, thekson ai.
Sipas Haradinajt, rastet e djegieve të makinave me targat RKS në veri të Kosovës, janë skenar për të penguar procesin zgjedhor aty.
“Incidentet e 2-3 ditëve të fundit në veri, janë tregues serioz se mund të ketë një skenar të pengimit të zgjedhjeve në veri, me pasoja edhe për sigurinë në atë zonë. Refuzimi i Listës Serbe për të marrë pjesë në zgjedhjet lokale atje, shpërfaq mosgatishmërinë e palës serbe që të zbatojë marrëveshjen e arritur në Bruksel.
Në të kundërtën angazhimi i jashtëzakonshëm i të gjitha palëve për këtë marrëveshje, do të mbetej përpjekje pa rezultat. Nëse marrëveshja nuk reflekton me një normalitet në terren, efektet e saj do të jenë të papërfillshme”, u shpreh ai.
Haradinaj shton se paqja në Kosovë është e padiskutueshme dhe inkurajon të gjitha palët në vendosmërinë e tyre për të mënjanuar të gjithë ata që e rrezikojnë, edhe marrëveshjen, edhe sigurinë.
Discussion about this post