Aeroporti Ndërkombëtar i Tiranës ka reaguar me anë të një njoftimi, në lidhje me incidentin e ndodhur në Aeroportin Rinasit. TIA njofton se në orën 16:15 të ditës së sotme, një avion i vogël model “Beechcraft” zviceran, me 4 persona në bord, dy të rritur dhe dy fëmijë, të gjithë shtetas zviceranë, bëri ulje të detyruar në mes të pistës pasi pësoi një avari në sistemin e rrotave.
Sipas TIA-s, pasagjerëve iu dha ndihma e parë menjëherë dhe fatmirësisht nuk ka asnjë të lënduar. Pas lajmërimit të Organit Kombëtar të Investigimit të Incidenteve Ajrore dhe kryerjes së investigimit në zonën e pistës, avioni është zhvendosur nga pista.
Si pasojë, operimet në Aeroportin Ndërkombëtar të Tiranës, u pezulluan për 1 orë e 45 minuta dhe që më pas kanë rifilluar normalisht.
