Shqipëria ka pozicionimin më të keq në Evropë dhe rajon, në Indeksin e Sundimit të Ligjit për 2020-2021. Në një publikim të bërë nga “World Justice Project”, institut kërkimor ndërkombëtar me qendër në SHBA, vendi ynë është përkeqësuar me 12 pozicione, në krahasim me periudhën 2018-2019.
Ky indeks bën matjen e zbatimit të ligjeve, nëpërmjet sondazheve dhe pyetësorëve, këtu përfshihen 139 vende.
Vendi ynë ka një renditje tejet negative në treguesin e korrupsionit, ku është në vendin e 105 nga 139 vende. Shqipëria cilësohet si vendi me korrupsionin më të lartë në Evropë dhe rajon. Sipas raportit, të gjitha vendet e rajonit kanë bërë hapa pas me korrupsionin në vitet e fundit.
Treguesi mat ryshfetin, konkurrencën në kontratat e punëve publike, ryshfetin në politikë dhe gjyqësor etj.
Shqipëria është përkeqësuar dukshëm edhe në treguesin e kufizimit në fuqinë e qeverisë, ku renditet në vendin e 109, duke u pozicionuar krah shteteve si Afganistani, Mozambiku etj. Treguesi mat shkallën në të cilën ata që qeverisin, janë të kufizuar nga ligji. Gjithashtu mat pavarësinë e gjyqësorit, funksionimin e agjencive audituese dhe sa pavarësi kanë ato të bëjnë kontrolle ndaj qeverisë, nëse mediat janë të pavarura, nëse zyrtarët zgjidhen sipas rregullave e procedurave të parashikuara nga kushtetuta.
Dy treguesit ku Shqipëria ka renditjen më negative, në Indeksin e fundit të Zbatimit të Ligjit, janë korrupsioni dhe kufizimet në fuqinë e qeverisë.
