Qytetarët shqiptarë mbeten më të keqpaguarit në rajon në raport me shpenzimet marramendëse për nevojat bazike. Madje, një qytetar shqiptar nuk ja del të përballojë rritjen e çmimeve, për aq kohë sa humbet një sasi të konsiderueshëm të ardhurash për shkak të mos indeksimit të pagave. Rezultatet e deritanishme tregojnë se “rritja e pagës minimale” e deklaruar nga qeveria është një vendim propagandues dhe nuk ka ndikuar aspak në të ardhurat e qytetarëve. Kështu le t’ia nisim nga përllogaritja e thjeshtë e të dhënave që ka publikuar Open Data Albania. Konkretisht, në vitin 2022 shihet se sa pak ka ndikuar në mirëqenien e qytetarëve rritja e pagës minimale, për të mos thënë që nuk ka sjellë asnjë ndryshim.
Në rastin e vitit 2022, edhe pse kemi një rritje të pagës minimale prej 2000 lekësh në krahasim me vitin paraardhës 2021, përsëri kjo rritje nuk është e mjaftueshme për të mbuluar rritjen e nivelit të çmimeve në nivelin që përllogarit INSTAT. Sipas këtyre të dhënave, deri në muajin prill, duke qenë se paga minimale nuk është rritur në krahasim me vitin 2021, humbja ka qenë në vlerën e 1800 lekë për 3 muaj.
Ndërkohë këtu del rezultati që, edhe pas rritjes së pagës minimale të ardhurat e qytetarëve shqiptarë vijnë në reduktim, për shkak se indeksimi i bërë nga qeveria është i papërfillshëm përballë çmimeve që kanë prekur majat. Sipas të dhënave të OpenData, në një vit qytetarët shqiptarë humbasin 500 mijë lekë nga të ardhurat e tyre për shkak të mos indeksimit të pagave,
“Për periudhën pas rritjes së pagës minimale, për pjesën e indeksimit të pagës minimale është marrë niveli i rritjes së çmimeve në muajin mars 2022. Kështu, humbja për periudhën prill-dhjetor 2022 është 3 098 lekë/9muaj. Në total humbja nga rritja jo e mjaftueshme për të përballuar nivelin e rritjes së çmimit, për një qytetar që punon me pagë minimale do të jetë 4 898 lekë/12 muaj”, thuhet në raport. Pra, sikur duket nga këto të dhëna vendimi për indeksimin e pagave ka rritur vetëm propagandën e qeverisë, se shqiptarët vazhdojnë të humbasin e të varfërohen.
Po sektori publik?
Skema propaganduese për indeksimin e pagave prek edh ata që punojnë në sektorin publik, si mësues, mjek, policë e të tjerë. Të dhënat janë marrë nga INSTAT tregojnë se, për vitet 2015 – 2020, kemi vetëm një rast kur paga mesatare nuk ka arritur që të indeksohet. Ky rast është viti 2016. Humbja në këtë rast është 2 055 lekë/ muaj ose 24. 661 lekë për gjithë vitin. Siç shikohet humbja nga mos-indeksimi i nivelit të pagës mesatare të përgjithshme, të asaj të sektorit publik dhe gjithashtu të pagës minimale, ka qenë më e lartë në vitin 2016. Për të tre rastet, viti 2016 arrin rekord negativ përgjatë viteve 2000-2022. Ndërsa për vitin 2021 dhe 2022 humbja e të ardhurave të punonjësve në sektorin publik arrin në 17.561 lekë për të gjithë vitin.
Sigurisht, ndërsa të ardhurat bien dhe çmimet rriten, mirëqenia në vendin tonë zbehet në vend që të përparojë. Në këto kushte rritja ekonomike do të mbetet gjithmonë në nivele të ulëta si 3% deri në 4%, të paktën ashtu sikur ka ndodhur në këto 10 vitet e fundit.
Discussion about this post