India bllokon fondet e huaja për organizatën bamirëse të Nënë Terezës

Qeveria e Indisë ka refuzuar të rinovojë licencën e financimit të huaj për një organizate bamirësie të themeluar nga Nënë Tereza.

Organizata “Misionarët e Bamirësisë” ka mijëra murgesha që mbikëqyrin projekte si shtëpi për fëmijët e braktisur, shkolla, klinika dhe bujtina.

Në ditën e Krishtlindjes, ministria e Brendshme e Indisë njoftoi se nuk e kishte rinovuar regjistrimin për shkak të “të ardhurave negative”.

Përfaqësuesit e linjës hindu kanë akuzuar prej kohësh këtë shoqatë për përdorimin e programeve të saj për të kthyer banorët në të krishterë.

BBC raporton se organizata bamirëse i ka mohuar këto akuza.

Në një deklaratë të hënën, organizata konfirmoi se aplikimi për rinovim ishte refuzuar dhe se nuk do të operonte asnjë llogari financimi të huaj derisa çështja të zgjidhej.

Më herët, kryeministrja e Bengalit Perëndimor, Mamata Banerjee, shkaktoi polemika pasi postoi në Twitter një lajm se qeveria kishte ngrirë llogaritë bankare të bamirësisë. Por qeveria dhe autoritetet lokale mohuan një gjë të tillë.

Organizata bamirëse me bazë në Kalkuta u themelua në vitin 1950 nga Nënë Tereza dhe është një nga organizatat bamirëse katolike më të njohura në botë.

Nënë Tereza u nderua me Çmimin Nobel për Paqe në vitin 1979 për punën e saj humanitare dhe u shpall shenjtore nga Papa Françesku në vitin 2016, 19 vjet pas vdekjes së saj.