Incidenti mes gazetares Anila Hoxha dhe një efektivi policie që ndodhi të shtunën në Qafë Mollë ka sjellë reagime të shumta në rrejt. Së fundmi ka reaguar edhe deputeti demokrat, Ervin Salianji, i cili përmes një postimi në Facebook shkruan se është qeveria ajo që dhunon gazetarët, ashtu sikur ka vepruar gjithmonë kundër medieve dhe lirisë së tyre.
Përmes këtij postimi, Salianji ngre akuza të forta për autoritetet përkatëse, duke thënë se nuk janë të aftë të veprojnë si duhet për të goditur krimin në vend dhe rritur sigurinë. Deputeti ka përmendur edhe përleshjen në Elbasan mes të rinjve ku mbeti i vrarë njeri prej tyre dhe u plagos i vëllai. Sipas tij, të gjitha këto tregojnë që qeveria e lë krimin të rritet.
“Shqipëria e destabilizuar nga krimi, në vetëm 24 orë, në mes të Tiranës kërcet arma në zonën më elitare, shpërthen tritoli në mes të qytetit, vrasje makabre po në Tiranë, përleshje me thika dhe vrasje në Elbasan! Vrasjet e tipit mafioz ende të pazbardhura, droga e përhapur më shumë se çamçakëzi! Qeveria e dorëzuar, tanimë ka harruar edhe show-n dhe reagon për turp duke dhunuar gazetaren që raporton nga vendngjarja duke thelluar krimin që po bëjnë nga prepotenca që ju vjen nga paaftësia dhe lidhjet me krimin”, shkruan ai.
Kujtojmë se efektivi i policisë që shtyu gazetaren Anila Hoxha dhe një operator nga vendi i ngjarjes ku u gjet trupi i biznesmenit Ruzhdi Hoxha, u pezullua nga detyra.
Discussion about this post