Gazetari Erl Murati shprehet se prokuroria shqiptare është e vonuar në bërjen transparencë për aferën e inceneratorëve.
I ftuar në një studio televizive, Murati tha se faktet e reja po dalin pas çdo muaji, por pavarësisht nga kjo drejtësia nuk vepron.
DORA E MAFIAS
“Inceneratorët, ky skandal është denoncuar që në 2018 nga opozita. Prokuroria është shumë e vonuar për të bërë transparencë. Kanë kaluar 5 vite kur u bënë denoncimet e para të opozitës në Parlament, të cilat kryeministri i ka tallur. Nuk është se nuk kemi patur sinjale, pavarësisht se me kalimin e muajve, viteteve po dalin shumë fakte të reja nga prokuroria dhe institucionet. Këto kanë rënë në vesh të shurdhët sa i takon institucioneve të drejtësisë shqiptare.
Mafia ndërkombëtare dhe krimi i organizuar kanë tre sektorë ku investojnë paratë, ndërtimi, lojërat e fatit kazinotë, janë dhe plehrat. Nëse marrim historikun e mafies italiane lidhja e Camorras, Sacra Corona Unita dhe Ndranghetas me çështjen e riciklimit të plehrave është e ngushtë dhe shkon pas në dekada, nuk është diçka e re. Nuk do të kishte për mua asnjë surprizë nëse do të zbulim se elementë mafioze si Ndrangheta të kenë lidhje me krimin e organizuar dhe biznesin pse jo të ndershëm deri dje shqiptar, për të patur biznes në Shqipëri. 12 vjet më parë Sacra Corona Unita ka patur biznes në Vlorë, e vërtetuar nga prokuroria dhe gjykata.
Afera e inceneratorëve është më e madhja e kësaj dekade për shumat e parave që fliten aty dhe mënyrën skandaloze në të cilën është ndërmarrë kjo sipërmarrje. Aty nuk ka vetëm një element, çalon që nga momenti i përzgjedhjes së disa njerëzve që nuk kishin lidhje me incenerimin e plehrave, pra nuk ka nevojë të jesh prokuror apo gazetar njohës i mirë i kësaj afere për të kuptuar që është aferë që bie erë. Njerëz pa asnjë lloj eksperience u kontraktuan për të bërë biznes me paratë e shtetit. Flasim për inceneratorë dhe duhet të kemi incenerim, por incenerim nuk ka”, tha Murati./Syri
Discussion about this post