Biznesmeni italian, Davide Pecorelli, i cili u zhduk nga faqja e dheut për thuajse 9 muaj, ka treguar më shumë detaje rreth inskenimit të vdekjes së tij.
Pecorelli është shprehur më herët për mediat italiane se ka qenë një prift që i ka dhënë idenë për eshtrat e djegura në makinë, emrin e të cilit refuzoi ta tregonte.
“Situata ishte dramatike në një nivel ekonomik, në atë moment vendosa të bëja vetëvrasje, por së pari – thotë ai në TV – shkova te një prift për të rrëfyer. Ishte ai që më tha për mundësinë e eshtrave (të vjedhura). Më tha ‘le t’i fusim në makinë dhe t’i vëmë zjarrin’ ”.
“Unë kurrë nuk do ta tregoj emrine tij sepse ai është personi që më shpëtoi jetën, kështu që nuk do ta tradhtoj”.
Ndër të tjera, ka treguar se ka gjetur tre arka me thesar, dhe se gjysmat do të duhej t’i ndante me priftin që e ndihmoi.
“Gjeta thesarin e San Mamiliano, ato janë tre arka me 250 kilogramë monedha ari të pastra prej pesë gramësh secila. Gjysmën duhet ta ndaj me priftin që më tregoi vendet e zbulimit”.
Ai tha në “La Vita in Diretta” se kishte gjetur dy nga tre arka me flori në Cala Corfù dhe Cala (ose Punta) Fortezza, disa ditë para se të përpiqej të zbriste në të tretën, në Cala Maestra, ku ai, u përgjua në bordin e gomoneve nga Policia Pyjore.
Pecorelli, i cili u shpall i zhdukur në janar të këtij viti në Shqipëri, kishte inskenuar si në një film vdekjen e tij për përfitimin e sigurimeve jetësore.
Makina të cilën ai e kishte marrë me qira në Rinas, u gjet e shkrumbuar me 6 janar në Pukë, ndërsa brenda ishin vendosur disa eshtra që vonuan hetimin për disa muaj për shkak të analizave të ADNS-së. Biznesmeni tashmë pritet t’i kërkohen sqarime në Itali dhe Shqipëri në lidhje me mënyrën se si u kthye atje, pasi sajoi zhdukjen në vendin tonë.
