Shtrenjtimi i çmimeve në tregjet globale ka goditur tregtinë e mallrave ku në 4 mujorin e parë të vitit, volumi i tregtisë së mallrave të importuara dhe eksportuara nga deti dhe hekurudha është ulur me 21.15% sipas INSTAT.
Nga janari deri në prill të këtij viti nëpër porte janë ngarkuar dhe shkarkuar 1.426 mijë ton, mallra duke u ulur me 6,9 %, krahasuar me 2021.
Volumi i tregtisë nëpërmjet hekurudhës shqiptare është ulur me 35.4% ndërkohë rritje ka regjistruar vetëm tregtia nga ajri. Pavarësisht se volumi i tregtisë në sasi është në rënie dyshifrore, tregtia në vlerë financiare është rritur për shkak se për të njëjtat produkte po paguhet më shumë për ti blerë. Në vlerë financiare vlera e importeve nga portet është rritur me 31.7%, duke arritur në 137 miliardë lekë.
Por rritja e çmimeve të larta ka rritur të ardhurat në buxhetin e shtetit pasi vetëm të ardhurat doganore në këtë katër-mujor të parë janë rritur me 18.1%, ku rolin kryesor e ka luajtur TVSH-ja në import. Vlera e TVSH-së që paguhet në zhdoganimin e produkteve është më e lartë për shkak se produktet po kushtojnë më shtrenjtë.
Qeveria vendosi të japë 3 miliardë lekë garanci sovrane për importuesit e produkteve ushqimore në mënyrë që ata të krijojnë furnizime deri në tre muaj.
Por pak ditë më parë Banka e Shqipërisë raportoi se bizneset në këtë periudhë të parë të vitit kanë rritur kërkesën për kredi me qëllim kryesor që të kenë likuiditet për të importuar.
Nga ana tjetër FMN thotë se goditja që po jep lufta në Ukrainë po përshpejton rritjen e inflacionit, çka dëshmon se rritja e çmimeve do të vijojë.
Discussion about this post