Në një kohë kur veprimet e qeverisë që ai drejton shkojnë ndesh me vullnetin e vërtetë për reforma, kryeministri Edi Rama ka deklaruar se procesi i integrimit në Bashkimin Europian është një proces që rrit kapacitetet institucionale të vendit.
Teksa ka bërë sot një panoramë të negociatave me Bashkimin Europian, ai foli për transformimin e shtetit dhe forcimin e rendit ligjor, ndërsa paralelisht ka refuzuar arrestimin e ministres Belinda Balluku, e cila akuzohet për korrupsion duke minuar të ardhmen e vendit drejt integrimit.
“Procesi ka shumë ngarkesë dhe është për tu përgëzuar e gjithë skuadra e negociatave, sikundër është për tu përgëzuar edhe puna e ministrave që janë më pranë këtij procesi.
Jo më larg se pak ditë më parë, Lamallari, Gogu dhe Dhuka bën prezantim shterues në tryezën e ambasadorëve të vendeve anëtare ne Bruksel. Ministri i jashtëm është i koordinuar me dy ministret e shtetit, për ti dhënë dimensionin politik procesit në komunikimin tonë ndërkombëtar.
Ajo që vlen më shumë se të gjitha, përtej realizimit të një mase, apo kalimit të një reforme dhe pastaj miratimit të masës, ose reformës në Bruksel është se ky proces rrit në mënyrë thelbësore kapacitetet institucionale të vendit. Procesi ka një dobi të jashtëzakonshme dhe është i pazëvendësueshëm.
Tendenca është që anëtarësimi të shihet në mënyrë sipërfaqësore dhe të mos kuptohet që ky proces është historik për faktin se transformon shtetin dhe u jep institucioneve një fuqi dhe një kapacitet për të vepruar që nuk e kanë pasur kurrë në historinë tonë. Rritja e kapaciteteve institucionale sjell edhe forcim të rendit ligjor në të gjitha aspektet”, tha Rama.
Discussion about this post