Inter është mundur në “San Siro” nga Roma me rezultatin 0-1 në kryendeshjen e javës së 34-të në Serie A, e cila ishte e programuar për t’u luajtur mbrëmë në darkë, por u shty duke qenë ditë zie për ndarjen nga jeta të Papa Françeskut.
Inter-it i duhej me patjetër fitorja pasi kryeson me pikë të barabarta kreun me Napolin, në anën tjetër Romës po ashtu i duhej me patjetër fitorja pasi pretendon për vendin e katërt.
Në minutat e para, Interi ka qenë më kërkues, por është Roma ajo që kaloi e para në avantazh. Verdhekuqtë e drejtuar nga Claudio Ranieri kanë gjetur golin me Matias Soule në minutën e 22-të, djaloshi argjentinas përfitoi nga një pavëmendje e mbrojtjes zikaltër dhe dërgoi topin në rrjetë. Pjesa e parë mbyllet 0-1 për Romën.
Një pjesë e parë shumë e dobët nga zikaltrit e Inzaghi-t, gjë që nuk ndryshoi as në pjesën e dytë. As zëvendësimet e kryera nga Inzaghi nuk sollën ndonjë dobi në lojë. Rezultati përfundimtar, Inter-Roma 0-1. Një fitore e madhe për verdhekuqtë që futen fuqishëm në garë për vendin e katërt, ndërsa Inter me këtë humbje mund të ketë hedhur poshtë gjithë sezonin. Në rast se Napoli fiton sonte në darkë ndaj Torino-s, shkon +3 pikë nga zikaltrit.
Në sfidën tjetër, Fiorentina fitoi 2-1 ndaj Empoli-t, duke u futur kështu në garë për vendin e katërt, pasi klubi vjollcë ka 59 pikë aq sa Lazio dhe Juventus, dhe është vetëm 1 pikë më pak se Roma dhe Bologna, e cila mban vendin e katërt.
Serinë e golave e hapi Yacine Adli në minutën e 7-të, ndërsa Mandragora dyfishoi shifrat me një supergol me roveshatë në minutën e 25-të. Në pjesën e dytë, Empoli ngushtoi shifrat me golin e Fazzini në minutën e 57-të.
Discussion about this post