Inter kampion i Italisë! Për herë të parë në histori, derbi i Milanos përcakton fituesin e titullit

Interi është kampioni i Italisë për sezonin 2023-2024, për herë në 20-të në historinë e klubit.

Zikaltërit morën tre pikët në derbin e kësaj të hënë kundër Milanit, duke siguruar matematikisht titullin kampion që i jep “dy yje” tanimë në fanelë. Interi fitoi 2-1 falë golave të Acerbit dhe Turam, ndërsa për kuqezinjtë shënoi Tomori në minutën e 80-të të sfidës që u mbyll mes tensioneve dhe tre kartonëve të kuq, për Theo-n, Dumfrie-s dhe në Calabria-n.

Kjo është hera e parë që rezultati në një derbi të Milanos përcakton fituesin e titullit kampion. Gjithashtu, edhe për trajnerin Simone Inzaghi ky është titulli i parë kampion në karrierë, ndërsa më parë kishte fituar Kupën dhe Superkupën.

Pesë javë nga fundi, çdo llogari tani është zeruar, me “zikaltërit” që rikthehen te titulli pas tre edicionesh, teksa me suksesin e arritur ndaj Milan-it shkuan në kuotën e 86-të pikëve, ndërsa ishte suksesi i gjashtë radhazi në derbi.

Në 33 ndeshje, Inter u ndal në vetëm 6 ndeshje, me Sassuolon që deri më tani mbetet skuadra e vetme që ka fituar ndaj “zikaltërve”, ndërsa janë edhe 5 barazime, me sulmin dhe mbrojtjen më të mirë të kampionatit.

Ashtu si skuadra, edhe Lautaro Martinez është pa rivalë në listën e golashënuesve, me argjentinasin që mbetet një prej “senatorëve” më të rëndësishëm te Inter-i dhe kryeson me 23 gola.

Kapiteni i Interit shprehu gëzimin për fitimin e titullit në derbi në një intervistë për “Dazn”. “Nuk mbaron më kjo (festa)”, u shpreh numri i 10 i zikaltërve, ndërsa shtoi se shpreson që së shpejti të arrijë edhe një marrëveshje me klubin për rinovimin e kontratës.

Titulli i parë edhe për Kristjan Asllanin i cili u aktivizua në minutën e 84’ në këtë derbi ndaj Milan-it, ndërsa këtë sezon deri më tani numëron 19 ndeshje, me 1 gol të shënuar dhe dy asist të dhuruar, e më titullin në kasafortë, për mesfushorin “kuqezi” që pritet të ketë më shumë hapësira.