Interi është zyrtarisht kampion i Italisë. Atalanta nuk ia doli të fitojë në Sassuolo, sfidë që përfundoi në barazim 1-1. Ky rezultat shpall ekipin e Antonio Contes fitues të titullit kampion katër javë përpara fundit të sezonit, duke e merituar plotësisht suksesin e madh.
Diferenca me Atalantën e vendit të dytë është 13 pikë, djemtë e Contës nuk mund t’i kapë më askush dhe populli interist ka nisur festën. Hera e 19-të që Interi fiton trofeun e madh, duke parakaluar kushërinjtë e Milanit (18), teksa i jep fund dominimit juventin, që zgjaste prej nënte vitesh radhazi.
