Një fund i çmendur i ka dhuruar Interit fitoren përballë Veronës në ndeshjen e parë të vitit 2024, atë që ka dekretuar zikaltrit si “Kampionë Dimri” në mbyllje të fazës së parë.
Skuadra e Inzagit pritej të dominonte ndeshjen ndaj ekipit mik dhe ashtu ndodhi, teksa gjeti shpejt golin me Lautaro Martinez dhe më pas administroi ndeshjen. Por zikaltrit gabuan duke mos mbyllur takimin dhe goli i Henri rivendosi gjithçka në lojë kur mbeteshin pak minuta deri në fundin e pjesës së dytë.
Arnautoviç gaboi disa raste të pastra para portës, teksa vetëm në minutën e dytë shtesë, Interi ia doli të shënonte me Fratezin pas zhvillimit të një goditje nga këndi mes polemikave pasi miqtë kërkonin faull.
Asgjë nuk mbaroi aty, pasi Verona kishte mundësinë që të barazonte shifrat me një penallti të fituar pas faullit të Darmian. Por Henri gaboi nga pika e bardhë duke goditur shtyllën e kështu, Interi mori tre pikët që e shkëpusin përsëri nga Juventusi ndjekës.
Discussion about this post