Interi ka mposhtur Cagliarin me rezultatin 3-1 në javën e 37-të të Serie A dhe ka transferuar luftën për titullin kampion në javën e fundit të kampionatit. Zikaltrit e Inzaghit zhvilluan një ndeshje të mirë në transfertë dhe dominuan takimin pothuajse gjatë 90 minutave.
Interi e nis në sulm ndeshjen dhe rrezikon gradualisht portën e Cagliarit. Milan Skrinuar realizon një gol pas vetëm 10 minutash lojë, por gjithçka anulohet nga sistemi VAR për një prekje të topit me dorë.
Megjithatë nuk vonon shumë dhe Interi gjen sërish golin, këtë herë me Darmian që “ngrihet në fluturim” dhe shënon një gol me kokë pas harkimit të Perisic. 1-0 dhe Interi e çon ndeshjen në rrjedhën e duhur për ta.
Zikaltrit vazhdojnë të sulmojnë, ndërsa Lautaro Martinez ka dy shanse të mira shënimi. Topi shkon në shtyllë, duke mos i lejuar sulmuesit argjentinas që të gjejë rrugën e rrjetës.
Ekipet shkojnë në dhomat e zhveshjes me rezultatin 1-0, ndërsa edhe pjesën e dytë, Interi e nis aty ku e la. Këtë herë Lautaro Martinez nuk gabon dhe shënon golin e dytë për Interin.
Gjithçka duket e mbyllur për Interin, por dy minuta më vonë, Lykogiannis rihap gjithçka me një supergol nga distanca. Cagliari provon të surprizojë për të shpresuar më shumë te mbijetesa, por pa sukses.
Në kampin zikaltër ndihet lodhja pas 120 minutash lojë në finalen e Kupës së Italisë, megjithatë, arrijnë ta kontrollojnë mirë lojën. Cagliari vazhdon të besojë te një rezultat pozitiv, por Lautaro Martinez gjen edhe golin e tretë për Interin duke i prerë të gjitha shpresat sardëve.
Në minutat e mbetura, Interi i afrohet sërish golit me Dumfries që godet shtyllën. Në fund ndeshja përfundon me rezultatin 3-1, me Interin që del nga kjo transfertë me pikë të plota.
Discussion about this post