Interi i Milanos është gati të sfidojë Romën për sulmuesin e West Ham United dhe Kombëtares Italiane, Gianluca Scamacca, duke bërë një ofertë për ta blerë atë plotësisht për rreth 22 milionë euro.
Kryeqytetasit kishin menduar vetëm pak ditë më parë se ishin në prag të arritjes së një akordi për ta marrë sulmuesin në huazim me të drejtë blerje, pasi londinezët i kishin rezistuar më parë kësaj formule transferimi.
Megjithatë, mediat italiane pretendojnë se “Marotta me shokë” tani mund t’i parakalojnë verdhekuqtë me një propozim zyrtar për të blerë Scamaccan.
Sipas mediumit Sky Sport Italia, Interi ka bërë një ofertë filletsare në shifrat 20-22 milionë euro për italianin.
I lidhur më parë edhe me skuadrën e Milanit, Scamacca është i etur për një rikthim në Serie A pasi luftoi për të shkëlqyer në sezonin e tij debutues në Premier League.
24-vjeçari u transferua nga Sassuolo te West Hami vetëm një vit më parë për 36 milionë euro plus 6 milionë euro të tjera bonuse dhe 10 për qind të tarifës së shitjes së ardhshme.
Scamacca ka 11 ndeshje për Kombëtaren e Italisë dhe është me origjinë nga Roma, ndërsa ka luajtur për moshat e Romës dhe Lazion.
Discussion about this post