Interi thyen minimalisht Juventusin në “Stadio Giuseppe Meazza” me shifrat 1-0. Një sukses shumë i rëndësishëm, me shumë peshë, që mund të vendosë në fund edhe titullin kampion. Zikaltërit e nisën “zjarr” ndeshjen, madje duke ushtruar presion konstant në portën e mbrojtur nga Wojciech Szczesny.
Ishte Mkhitaryan që tentoi të zgjidhë sfidën me një goditje nga distanca, por muri bardhezi i tha jo. Më pas, të besuarit e Inzaghit rritën presionin, një top perefekt i Dimarcos, nuk u shfrytëzua si duhet nga francezi, i cili bëri më të vështirën. Edhe nga fare pranë, Thuram nuk shtyu dot topin në rrjetë.
“Zonja e Vjetër” u shfaq pas gjysmë ore lojë në portën e vendasve. Zbritja e Juventusit mund të përfundonte me gol, nëse Vlahovic do tregohej i saktë. Djemtë e Max Allegrit e panë veten në disavantazh në minutën e 37-të, kur një devijim i Gattit i dhuroi epërsinë skuadrës nga Milano.
Në fillimin e pjesës së dytë, një e majtë tokazi e Dimarcos shkaktoi drithërima te torinezët, por vetëm kaq, pasi topi doli jashtë. Në të 58-tën, Calhanoglu “flirtoi” me golin e sigurisë, vetëm shtylla ndali mesfushorin turk.
Interi festoi në fund dhe me të drejtë. Përveç fitores në Derbi D’Italia që kënaq tifozët, aktualisht kryeson kampionatin me 57 pikë, 4 pikë më shumë Juvja, për më tepër edhe një ndeshje më shumë në dispozicion.
Discussion about this post