Bashkëshorti i ish-ministres Olta Xhaçka, Artan Gaçi është paraqitur këtë të premte në Prokurorinë e Posaçme. Burime pranë akuzës bëjnë me dije se Gaçi u thirr në prokurori për të dhënë shpjegime si person që ka dijeni, lidhur me procedimin e tjetërsimit të pronave, që çoi pas hekurave ish-kryebashkiakun e Himarës Gorgo Goro.
Pas më shumë se 4 orë në SPAK, Gaçi nuk preferoi të jepte një prononcim për mediat pasi doli nga Struktura e Posaçme, duke shmangur pyetjet e gazetarëve.
Kjo është hera e dytë që Gaçi paraqitet në SPAK. Prona që ishte blerë nga kompania e tij ndodhet në sekuestro. Sipas SPAK, ajo është përfituar në mënyrë të jashtëligjshme.
Hetimet
Sipas hetimeve paraprake, Goro në bashkëpunim me persona të tjerë nën hetim, kanë realizuar me veprime konkrete zhvendosjen faktike në terren të një sipërfaqe tokë bujqësore prej 5 080 m2, duke ja mbivendosur atë një pasurie tjetër në pronësi të shtetit.
Shtetasit nën hetim, vlerëson akuza, kanë tejkaluar të gjitha kompetencat që ligji i njeh, duke u shprehur për ekzistencën e një mbivendosje pasurish të paluajtshme në terren dhe më pas duke konfirmuar një plan vendosje, e cila nuk i korrespondon rrethanave faktike në terren.
Kjo planvendosje ka shërbyer jo vetëm për transaksionet e mëpasshme ndërmjet subjekteve të ndryshëm por edhe për zhvillimin e pronës, përfshirë këtu pajisjen me leje ndërtimi për një kompleks turistik në emër të shoqërisë tregtare të Artan Gaçit, i cili do të ndërtohet mbi këtë sipërfaqe toke, por edhe mbi atë prej 5 512 m2 të sekuestruar më parë nga Prokuroria e Posaçme.
“E gjithë sipërfaqja e tokës bujqësore prej 10 592 m2, e cila i është nënshtruar procedurave të sekuestros preventive në dy faza, është në fakt pronësi shtet dhe rezulton të jetë tjetërsuar e më pas zhvilluar nga një subjekt privat”, njofton SPAK.
Pavarësisht se Gaçi rezulton përfitues fundor i tokës, ndaj tij nuk është ngritur ende asnjë akuzë.
Lidhur me çështjen, opozita ka kërkuar heqjen e mandatit të deputetes për Olta Xhaçkën, megjithatë ish-ministrja është mbrojtur nga mazhoranca e drejtuar nga Edi Rama.
Discussion about this post