Interi arriti një fitore të pastër në transfertë ndaj Fejnordit, me rezultatin 0-2, duke hedhur një hap të sigurt drejt kualifikimit. Titullar në këtë përballje u aktivizua edhe Kristjan Asllani, i cili mori edhe përgëzimet e trajnerit Inzagi, i cili në deklaratën e dhënë pas ndeshjes u shpreh se bëri lojë të shkëlqyer.
“Asllani dhe Zielinski? Nuk kam pasur kurrë dyshime për ta: ata bënë një lojë të shkëlqyer. Më pas, normalisht që unë jam këtu për të bërë zgjedhje të vazhdueshme. Çalha dhe Miki kishin luajtur ndaj Napolit dhe unë zgjodha t’i ndryshoja pa i mërzitur.
Fejnord është një kundërshtar cilësor që luajti me katër sulmues. Kishim të dëmtuar 4 nga 5 mbrojtës të majtë. Bastoni luajti një lojë të shkëlqyer. Një qendërmbrojtës i klasit botëror që përshtatet dhe sakrifikon veten.
Duam të vazhdojmë rrugëtimin tonë në Ligën e Kampionëve, në kampionat dhe në Kupën e Italisë. Është vetëm gjysma e parë, Fejnordi ka shënuar 3 gola në Mançester. Duhet të jemi shumë të kujdesshëm”, deklaroi Inzagi.
Mesfushori i Kombëtares shqiptare, Kristjan Asllani ka folur pas ndeshjes së Champions League, ku Interi i tij fitoi në transfertë 0-2 përballë Feyenoord.
Titullar në këtë sfidë, Asllani thotë se mund të kishin shënuar më shumë gola. Ndër të tjera, shqiptari thotë se ekipi i tij i merr ndeshjet njëra pas tjetrës, duke qenë të përqendruar gjatë gjithë kohës.
“Kishte për të vuajtur, u treguam të aftë. Gjysmë ora e parë ishte shumë e komplikuar, por pas golit morëm kontrollin e lojës, marrim me vete në shtëpi këtë rezultat që është shumë i rëndësishëm. Ekzistonte ndjesia që do të vinte goli, kemi pasur raste dhe pastaj ishim të aftë që të mbyllnim ndeshjen. Mund të bënim golin e tretë por jemi të lumtur. Tani duhet të mendojmë për Monzën dhe pastaj të kthehemi të përqendrohemi te Liga e Kampioneve.
Ambiciet në Europë? Sigurisht, kemi qenë të qartë që në fillim, edhe pse ka shumë skuadra të forta. Mendojmë ndeshje pas ndeshje, pastaj ta shohim. Tani është Monza, ndeshje thelbësore për ne. Më pas do të mendojmë për Feyenoord.
Monza e motivuar? Sigurisht, por ne jemi mirë. Ata janë poshtë në klasifikim, por unë kam luajtur në skuadra që duhej të mbijetonin, e di që do të japin shpirtin, duhet të tregohemi të aftë që të fitojmë. Do të jetë e vështirë, askush nuk vjen për të humbur, por do të mundohem të sigurojmë tre pikët që janë objektivi ynë”, tha Asllani.
Discussion about this post