Trajneri i Interit, Simone Inzaghi, deklaroi se skuadra e tij ka entuziazëm që do të luajë në gjysmëfinalen e Ligës së Kampioneve, pavarësisht momentit të keq të rezultateve.
Tekniku zikaltër u shpreh se Interi ka arritur gjëra të mëdha në katër vite dhe rezultatet e fundit nuk mund të fshijnë këtë.
Sipas Inzaghit, ekipi duhet të japë më të mirën, ndaj një prej ekipeve më të forta në botë.
“Ekipi ka bërë gjëra të jashtëzakonshme këto katër vite dhe javët e fundit nuk mund ta fshijnë këtë. Duhet të kishim bërë më mirë në tre ndeshjet e fundit, por jemi këtu, duke garuar për të gjitha objektivat, ndonëse disa thanë se do e kishim të vështirë të kapnim katërshen e parë.
Nuk keni për të më dëgjuar kurrë që të flas keq për djemtë apo klubin. Me ta dhe tifozët kemi arritur deri këtu. Kur luan një gjysmëfinale në Ligën e Kampioneve, ka entuziazëm. Vijmë nga një javë e keqe dhe duhet të bëjmë shumë mirë. Duhet të japim më të mirën, ndaj një prej ekipeve më të forta në botë”, deklaroi Inzaghi.
Ndeshja Barcelona-Inter do të luhet të Mërkurën, duke nisur nga ora 21:00.
Discussion about this post