“A don ti Gjin me i luftue turqit…” një shprehje që ngacmon memorien në filmin e heroit tonë kombëtar, por me prezencën dhe ultimatumet e Ankarasë zyrtare, dhe vetë Sulltanit, brenda në parlamentin shqiptar për gylenistët e Fetos nëpër Shqipëri bëri që epoka historike e heroit të dilte violinë e dytë. Rama aktivizoi tërë shtetin sepse vinte Vëllai i Madh i Turqisë mike. Dhe vinte pikërisht në ditën e vdekjes shekuj më parë të Skënderbeut, që për 20 vite u rrit në portat e Bosforit, por më pas u përball me shpurën e hordhive turke për shekuj.
Histori sulltanësh, por që përsëritet tashmë me histori Sulltanësh realë, mes Ankarasë dhe Tiranës. Një Sulltan atje, një këtu, dhe një Parlament që është tërësisht dëgjimor përballë ultimatumit të vetë Presidentit Erdogan: “Radhën e ardhshme kur të vij dua veprime konkrete!”. Një histori të tillë Rama e kish marrë si porosi vite më parë, në startin e pashallëkut të tij rilindas, por tashmë ishte count-downi i fundit nga vetë ai që ka ndikim të madh dhe që konsiderohet si suporteri kryesor i kryeministrit edhe në kohët e momentet më delikatë te skandaleve të tij qeveritare në këto vite.
Erdogan erdhi për inaugurimin e Xhamisë së restauruar me fondet e Qeverisë turke nëpërmjet projektit “Tika”, por me mosprezencën e kreut të Komunitetit Mysliman. Vjen në ditën e vdekjes së heroit kombëtar, me Ramën që e pret dhe e përcjell deri te shkallët e avionit, përfshirë të gjithë Qeverinë e tij, për ardhjen e babait. Abi, fjala më e lakuar gjatë gjithë ditës së djeshme, teksa Pashai i Pashallëkut shqiptar krenohej me këtë vizitë si për të çuar selam te kundërshtarët e tij politikë, për të bërë kujdes, se potenca e tij është para syve.
Basha në sallë si dëgjues, ishte një tjetër eksponent, që në heshtje, i kujtonte Ramës në distancë edhe partnershipin e fortë me një tjetër superfuqi, atë botërore të SHBA. Rama ndërkaq, në këtë vizitë të planifikuar në një datë ndryshe, arriti që me influencën e tij të spostonte takimin e vetë Vëllait të Madh në Presidencën e zhurmshme, dhe të vazhdojë në binarin e tij që ka zgjedhur, Turqinë.
A do ta zbatojë Rama iradenë e Pashait të tij?
A do të largohen gylenistët nga ky vend, sipas asaj që Erdogan e konsideroi vetë si një rrezik real edhe për Shqipërinë?
A do të procedohen ata, apo do të importohen si element për drejtësinë e shtetit turk.
Xhamia e restauruar u inaugurua, marrëveshje u bënë shumë, por mesazhi i Presidentit turk në aulën qendrore të ligjbërjes e ligjvënies, në Parlament ishte i prerë, deri edhe në formë imperative: Ndaloni gylenistët, ndryshe ju lamë…!
Tani topi është në fushën e Ramës, për pak kohë testimi, në lidhje me reagimin shtetëror dhe të Agjencive ligjzbatuese, gjithmonë nëse reagimi do të jetë përkthyer si një urdhër vëllai, apo ka mbetur e do të mbesë në nivelet e një mesazhi politik.
Discussion about this post