Një iraken është dënuar me burgim të përjetshëm me akuzën për “trafikim njerëzor”. Sipas burimeve lokale, i dënuari, kishte rekrutuar banorë vendas për t’i dërguar të luftonin përkrah Rusisë kundër Ukrainës.
Gjykata Penale e Najafit deklaroi se i dënuari Risan Falah Kamel, kishte formuar grupe më parë dhe i kishte dërguar në vende të ndryshme për të luftuar, në këmbim të përfitimeve financiare.
Vendimi u bazua në ligjin irakian kundër trafikimit të qenieve njerëzore.
Një zyrtar gjyqësor dhe një oficer i lartë sigurie, të cilët folën në kushte anonimiteti, konfirmuan se Kamel ishte dënuar për rekrutimin dhe dërgimin e luftëtarëve që iu bashkuan ushtrisë ruse.
Më herët këtë vit, zyrtarë ukrainas thanë se një numër i konsiderueshëm shtetasish kinezë po luftonin përkrah Rusisë dhe se kishin mbledhur informacione për më shumë se 150 mercenarë të rekrutuar përmes rrjeteve sociale. Pekini e mohoi këtë pretendim. Po ashtu, zyrtarë amerikanë dhe koreano-jugorë kanë deklaruar se Koreja e Veriut ka dërguar mijëra trupa dhe municione për të ndihmuar Rusinë në front, veçanërisht në betejën në Kursk, ku forcat ukrainase kishin ndërmarrë një sulm të befasishëm gushtin që lamë pas.
Discussion about this post