Ashtu siç pritej, Donald Trump rrëmbeu të gjithë vëmendjen në samitin e NATO-s, në Hagë.
Presidenti amerikan pati një takim të veçantë me kreun e aleancës veri-atlantike, Mark Rutte, e ndonëse biseda u fokusua në çështje serioze, nuk munguan as batutat.
“Izraeli dhe Irani nuk do të luftojnë më me njëri-tjetrin. E kanë mbyllur. Ishte si një sherr mes dy fëmijëve në oborrin e shkollës. Luftojnë si të çmendur, nuk hyn dot mes tyre. Kështu që lëri më mirë të zihen për dy apo tre minuta, se pastaj, e ke më të lehtë t’i ndash”.
Dhe babai duhet të përdorë ndonjëherë një gjuhë të ashpër, ia ktheu me buzëqeshje Rutte, që është përpjekur shumë ta marrë me të mira presidentin amerikan. Trump e miratoi komentin e tij, ndërsa në koferencën pas Samitit u shpreh se zyrtarët amerikanë dhe iranianë do të vazhdojnë bisedimet javën e ardhshme, për të vazhduar dialogun për armët bërthamore, që u ndërpre nga lufta mes dy vendeve të Lindjes së Mesme.
Gjatë konferencës me gazetarët, Presidenti Donald Trump tha se në javët e fundit ka qenë i përfshirë edhe në zgjidhjen e disa konflikteve të tjera, duke përfshirë Kosovën dhe Serbinë.
“Në javët e fundit kemi punuar me Indinë dhe Pakistanin, Kosovën dhe Serbinë. Mendoj se të premten pritet të vijnë edhe përfaqësuesit e Kongos dhe Ruandës, pasi atje ka pasur një konflikt të ashpër”.
Presidenti amerikan këmbëngulë se duhet t’i jepet Çmimi Nobel për Paqe, për faktin se ka ndaluar shumë luftëra nëpër botë.
Rutte u pyet nga një gazetar mbi mungesën e përmendjes së rajonit në deklaratën përfundimtare të samitit.
“NATO vazhdon të jetë e fokusuar në rajon përmes pranisë së KFOR-it në Kosovë dhe EUFOR-it në Bosnje e Hercegovinë”, tha Rutte.
Ai bëri të ditur se ka vizituar personalisht rajonin dhe është takuar me liderët lokalë, si në Kosovë ashtu edhe në Bosnje, për të thelluar bashkëpunimin.
gijotina.com/
Discussion about this post