SHBA-ja “duhet të kontrollojë Izraelin” nëse dëshiron të shmangë një luftë rajonale, tha sot ministri i Jashtëm iranian Hossein Amir Abdollahian nga Bejruti, ku ndodhet për një vizitë, duke shtuar se Irani dëshiron të garantojë sigurinë e Libanit.
“Amerika dëshiron të lejojë Izraelin të shkatërrojë Gazën dhe ky është një gabim serioz. Nëse amerikanët dëshirojnë të shmangin përhapjen e luftës në rajon, ata duhet të kontrollojnë Izraelin”, theksoi Amir Abdollahian teksa u foli gazetarëve.
“Nëse krimet izraelite nuk ndalen, ne nuk e dimë se çfarë do të ndodhë,” paralajmëroi ai.
Megjithatë, ministri iranian theksoi se “siguria dhe paqja e Libanit janë të rëndësishme për ne”, pasi rriten shqetësimet se lëvizja libaneze Hezbollah, një aleate e Iranit, mund të hapë një front të ri kundër Izraelit.
Deklaratat e Amir Abdullahian erdhën pasi Izraeli duket se po përgatit një operacion në Rripin e Gazës në përgjigje të sulmit të nisur nga Hamasi.
Ministri iranian foli dje të enjten në Bejrut, ku u takua me kreun e Hezbollahut Hassan Nasrallah dhe kreun e qeverisë libaneze Najib Mikati.
Si Izraeli ashtu edhe SHBA-ja janë të shqetësuar se një front i dytë mund të hapet në Izraelin verior në kufirin me Libanin nëse Hezbollahu vendos të ndërhyjë në konflikt.
Që nga fillimi i luftës më 7 tetor, përfshirja e lëvizjes libaneze nga Libani jugor ka qenë i kufizuar, me disa bombardime të pozicioneve izraelite në Izraelin verior në mbështetje të Hamasit.
Discussion about this post