GJKKO dhe avokatët e ish-Kryeministrit Sali Berisha janë përfshirë në një përplasje në distancë, ndërsa “mollë sherri” është bërë Irena Gjoka, kryetarja në detyrë e GJKKO, njëherazi edhe gjyqtarja që do të vlerësojë masat e sigurisë ndaj kreut demokrat, për të cilin SPAK ka kërkuar “arrest shtëpie”.
E ndërsa më herët, GJKKO njoftoi se deri në orën 16:00 avokatët e ish-Kryeministrit Sali Berisha nuk kanë depozituar asnjë kërkesë me shkrim për përjashtimin e gjyqtares Gjoka, në një reagim mbrojtësit ligjorë të kreut të PD-së, i kërkojnë GJKKO të informojë se cila është arsyeja pse nuk dha vendimin e mospranimit të kërkesës së tyre.
Sipas tyre kjo kërkesë nuk u vu në dispozicion të tyre deri në orarin zyrtar, sikurse iu ishte premtuar zyrtarisht dhe verbalisht.
“GJKKO të informojë, se cila është arsyeja që deri në orarin zyrtar nuk vuri në dispozicion vendimin e papranueshmërisë se kërkesës për përjashtimin e gjyqtares Irena Gjoka sikurse i’u premtua avokatëve zyrtarisht dhe verbalisht”, thuhet në reagimin e tyre.
Seanca për rivlerësimin e masës së sigurisë ndaj ish-Kryeministrit Berisha është njoftuar se do të mbahet ditën e shtunë, 30 dhjetor, në orën 12:00. Nuk dihet nëse GJKKO do të shpallë nesër vendimin, apo do të ketë një tjetër shtyrje seance.
Discussion about this post