Ish-kryetari i Lidhjes Demokratike të Kosovës, Isa Mustafa, ka dalë sot me kritika të forta ndaj Lëvizjes Vetë Vendosja. Ai ka kritikuar ditën e sotme koalicionet politike të realizuara së fundmi në nivel lokal, edhe pse u ka uruar punë të mbarë.
Mustafa foli për një nga koalicionet nga ana e LVV) me Partinë Demokratike të Kosovës, koalicion të cilin e ka quajtur një martesë për të mbetur në pushtet. “Koalicionet shprehin realitetin tonë por edhe qesin në pah tërbimin e pashembullt politik që ushtrohej në të kaluarën nga VV dhe disa figurave “Guxo” ndaj atyre që bënin koalicion me PDK-në. Tani ata po “martohen” me PDK-në për të mbetur në pushtet. Jo vetëm për letra. Dikush mund të thotë, kjo është tjetër PDK; nuk është Thaçi, është tjetërkush. E unë ju them se kjo është parti e themeluar nga z.Thaçi dhe se VV me shumë dëshirë dhe xhentilesë po bënë koalicion me partinë e Hashim Thaçit. Dashuria kurorëzohet me martesë….Dhe këtu asgjë s’ka të keqe. Edhe LDK po ashtu”, deklaroi ish-kreu i LDK-së.
Ditën e sotme LVV dhe PDK kanë arritur koalicion qeverisës në Gjilan. PDK-së do t’i takojë pozita e nënkryetarit të komunës dhe katër drejtori, ndërkaq partia fituese e zgjedhjeve do të udhëheq me drejtoritë të tjera.
Discussion about this post